Ministri i Infrastrukturës, Pal Lekaj, priti kryetarin e Shtërpcës, Bratislav Nikoliq dhe e njoftoi se tashmë është nënshkruar kontrata për mbështetje të projektit, për rregullimin e infrastrukturës së Shtërpcës, njofton kumtesa, transmeton Koha.net .
Ky projekt mbështetës nga Ministria e Infrastrukturës në komunën e Shtërpcës, kap vlerën prej afro 1.2 milionë euro dhe përfshinë ujësjellësin, kanalizimin, si dhe ndriçimin publik, duke filluar nga Brezovica deri në Qendrën e Skijimit, përfshirë edhe tërë “weekend zonën”.
Lekaj tha se ky investim po bëhet me qëllim të përmirësimit të infrastrukturës në këtë pjesë tejet me rëndësi për zhvillimin e turizmit, i cili ndikon pozitivisht në rritjen ekonomike të vendit dhe i jep pamje moderne kësaj ane të frekuentuar nga vizitorët.
Kryetari i Shtërpcës, Bratislav Nikoliq, duke e falënderuar ministrin Lekaj për mbështetjen, tha se ky investim i jep shtytje turizmit në këtë pjesë kaq të pasur me bukuri natyrore. Kurse me këtë mbështetje nga ministri Lekaj dhe Ministria e Infrastrukturës, po jepet sinjal i qartë se të gjithë bashkë, jemi të interesuar që t’i japim imazhin e duhur kësaj zone.