Meta pret miratim të shpejtë të ligjit për gjuhën shqipe nga Parlamenti i Maqedonisë

Presidenti i Shqipërisë, Ilir Meta, priti në një takim të veçantë kryetarin e Asamblesë së Republikës së Maqedonisë, Talat Xhaferi.

Meta i tha Xhaferit se mezi pret anëtarësimin e Maqedonisë në NATO dhe e siguroi atë për mbështetjen e fortë të Shqipërisë në këtë drejtim.

Duke vlerësuar tendencën pozitive për zgjidhjen e çështjes së emrit, Presidenti nënvizoi se, “stabiliteti dhe zhvillimi i Maqedonisë është në interesin e drejtpërdrejtë të Shqipërisë, por edhe për të gjithë rajonin”.

Meta shprehu besimin për miratimin së shpejti të ligjit për gjuhën shqipe nga Parlamenti i Maqedonisë, duke theksuar se ky akt do të ndihmonte në përmirësimin e mëtejshëm të marrëdhënieve ndër-etnike në Maqedoni.

Të dy bashkëbiseduesit vlerësuan takimin e parë midis Qeverive të të dy vendeve, si dhe ndanë të njëjtin mendim se zhvillimet e sotme rajonale dhe globale kërkojnë një bashkëpunim dhe ndërlidhje edhe më të mirë, infrastrukturore, energjetike dhe njerëzore midis dy vendeve.