Presidenti i Shqipërisë Ilir Meta mbajti sot fjalimin para asamblesë së përgjithshme të OKB-së. Meta përshëndeti marrëveshjen mes Maqedonisë dhe Greqisë si një zhvillim pozitiv për stabilitetin e Ballkanit, që siç u shpreh ai, i ka të gjitha shanset të bëhet një marrëveshje historike.
Meta bëri thirrje sot gjatë fjalimit të tij në OKB për miratimin e referendumit të së dielës në Maqedoni për ndryshimin e emrit.
“Ne u kemi bërë thirrje të gjithë aktorëve politikë në Maqedoni, përfshirë udhëheqësit lokalë shqiptarë, që të angazhohen në mënyrë aktive për suksesin e referendumit të 30 shtatorit, duke mbështetur një votë në favor të marrëveshjes”, tha Meta, transmeton Zëri i Amerikës.
Presidenti i Shqipërisë tha se në kushtet kur në Ballkan vazhdojnë proceset për paqen dhe integrimin, Shqipëria beson se çdo marrëveshje dy-palëshe e arritur mes vendeve ballkanike, kontribuon drejtpërdrejt tek paqja, siguria, qëndrueshmëria dhe zhvillimi ekonomik. Ai tha se marrëveshja e arritur kohët e fundit mes Greqisë dhe Maqedonisë, i ka të gjitha mundësitë të bëhet një arritje historike.
Meta tha se përkushtimi ndaj NATO-s dhe BE-së janë garancia më e mirë për të gjitha vendet dhe qytetarët e rajonit të Ballkanit. Ai tha se kushtet aktuale favorizojnë përparimin e mëtejshëm të dialogut mes Kosovës dhe Serbisë, me ndërmjetësimin e BE-së. Ai tha se është shumë e rëndësishme, që merrëveshja mes të dy vendeve të mishërojë energji pozitive, mbështetjen e vlerave europiane të bashkëjetesës dhe harmonisë ndëretnike.
Edhe
Meta: Nga anëtarësimi i Kosovës në OKB do të përfitonte edhe bashkësia ndërkombëtare
“Është shumë e rëndësishme që kjo marrëveshje t’i qëndrojë larg historisë të së kaluarës dhe të përmirësojë jetën e përditshme të qytetarëve të të dyja vendeve. Le të mbajmë parasysh të shkuarën historike të Ballkanit, që ka të bëjë me ndryshime famëkeqe të kufijve, spastrimin etnik dhe zhvendosjet e dhunshme masive”, tha Meta.
Presidenti Meta tha se Shqipëria mirëpret çdo përpjekje të vendeve anëtare të OKB-së të vazhdojnë ta njohin shtetin e Kosovës dhe të mbështesin anëtarësimin e saj në organizatat rajonale dhe ndërkombëtare.
