Marrëdhëniet Kosovë - Mali i Zi shënojnë përparim

Përfaqësues të ministrive të jashtme të Kosovës e të Malit të Zi janë takuar në Podgoricë për të diskutuar çështje nga fusha e bashkëpunimit ekonomik e politik midis dy vendeve.

Bëhet e ditur se delegacioni i Ministrisë së Jashtme të Kosovës udhëhiqej nga drejtori i përgjithshëm, Albert Prenkaj, ndërsa palën malazeze Ivan Lekoviq, drejtor i Përgjithshëm i Bilaterales. Bëhet fjalë për një takim të rregullt pune, konsultë politike.

Takimi u zhvillua në Podgoricë, ndërsa temat që u trajtuan kanë përfshirë marrëdhëniet bilaterale, bashkëpunimin ekonomik, vlerësimin e gjendjes në lëmin e raporteve kontraktuale ndërmjet dy vendeve, bashkëpunimin në kuadër të integrimeve në NATO dhe BE dhe bashkëpunimin multilateral dhe rajonal.

Gjatë këtij takimi u vlerësua se marrëdhëniet bilaterale ndërmjet Kosovës dhe Malit të Zi, janë shumë të mira dhe që nga konsulta e kaluar kanë shënuar progres, që mund të vërehet përmes kontakteve të shumta e të rregullta, vizitave të drejtuesve më të lartë shtetëror si dhe mbështetje reciproke.

Në takim është konfirmuar gatishmëria dhe interesimi i ministrit të jashtëm të Malit të Zi, Darmanoviq për vizitë zyrtare në Prishtinë, gjatë gjysmës së parë të muajit mars, thuhet në komunikatë.