MAPL-ja shpërblen edhe Gjilanin e Drenasin për performancë të vitit 2017

Komunat e Gjilanit dhe Drenasit kanë pranuar nga Ministria e Administrimit dhe Pushtetit Lokal grante prej 84 mijë eurove, përkatësisht 82.380 euro për raportin e Performancës komunale për vitin 2017, duke u radhitur në mesin e komunave me performancën me të lartë në nivel vendi.

Kryetari i Komunës, Lutfi Haziri, pasi ka falënderuar MAPL për vlerësimin e lartë, ka thënë se ky grant do të përdoret për të realizuar një projekt të rëndësishëm komunitar.

“Jam jashtëzakonisht i lumtur me këtë vlerësim të lartë për Gjilanin nga ana e MAPL. Ky është rezultat i punës së madhe ekipore në Gjilan në të gjitha sektoret. Në veçanti, e falënderoj koordinatorin e SMPK dhe zyrtarët për performancë për punën e madhe që kanë bërë në këtë aspekt dhe ju siguroj që këtë grant do ta shfrytëzojmë për realizimin e një projekti të rëndësishëm në infrastrukturë”, ka thënë Haziri.

Kryetari Ramiz Lladrovci ka falënderuar MAPL-në për vlerësimin e lartë të Komunës së Drenasit dhe ka thënë se mjetet e këtij granti do të përdorën për të mirën e komunitetit.

Ai ka shtuar se ky është rezultat i punës së madhe ekipore në Komunën e Drenasit ne të gjithë sektorët për vlerësimin që i është bërë në Raportin Vjetor të Performancës Komunale të vitit 2017.