Lidhja Demokratike e Kosovës ka mohuar se ka koalicion qeverisës me Partinë Demokratike të Kosovës në Prishtinë.
Përmes një komunikate, ka thënë se LDK-ja nuk ka marrë pjesë në asnjë proces ndërpartiak për ndonjë marrëveshje bashkëqeverisëse politike deri më tani.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo “LDK ka strukturat e veta partiake, organet vendimmarrëse lokale dhe më gjerë; dhe këto struktura nuk kanë qenë pjesë e asnjë marrëveshjeje qeverisëse. Çdo marrëveshje tjetër nuk përfaqëson qëndrimin zyrtar të Lidhjes Demokratike të Kosovës. Si e tillë, ajo nuk krijon obligime politike për LDK-në dhe nuk mund të konsiderohet si vullnet i organizuar i saj. Palët dhe subjektet e tjera politike e dinë shumë mirë se si ndërtohen marrëveshjet ndërpartiake me LDK-në; përmes strukturave zyrtare, transparencës dhe vendimmarrjes institucionale. Çdo përpjekje për ta anashkaluar këtë rrugë nuk përbën marrëveshje me LDK-në”, thuhet në komunikatë.
Tutje thuhet se për çështjet tjera lokale, LDK-ja do të angazhohet pas zgjedhjeve nacionale.
“Në këtë fazë, LDK dhe anëtarësia e saj janë të angazhuar plotësisht në procesin e ringritjes së përbashkët. Asnjë agjendë tjetër nuk mund ta zbehë këtë përkushtim”, thuhet në komunikatën e LDK-së.
Kryetari i PDK-së në Prishtinë, Uran Ismaili, në një emision televiziv të hënën në Televizionin 7 ka thënë se kanë arritur koalicion me LDK-në në kryeqytet.
Ish-drejtori i Drejtorisë së Investimeve Kapitale në Komunën e Prishtinës, Sokol Havolli, ka deklaruar se është shkarkuar nga pozita siç ka thënë, shkaku i afrimit të Ramës me Partinë Demokratike të Kosovës. Havolli pas shkarkimit ka thënë se për këtë hap është njoftuar të enjten gjatë një takimi nga kryetari Rama.
Abdixhiku për Ramën: Ka qenë kandidat i pavarur në listën e LDK-së
Photo: Driton Paçarada
Kryetari i Lidhjes Demokratike të Kosovës, Lumir Abdixhiku, ka thënë se LDK-ja s’ka koalicion me PDK-në në kryeqytet, pasi kryetari i Prishtinës Përparim Rama vendosi të bashkëqeverisë me PDK-në.
Abdixhiku i pyetur nëse Rama është anëtar i LDK-së, është përgjigjur se ai “ka qenë kandidat i pavarur brenda listës së LDK-së”.
“Kryetarët e komunave kanë të drejtë të bëjnë marrëveshje për shumicën që ata konsiderojnë, po nuk mund të them se ne kemi marrëveshje me PDK-në. E kam komunikuar edhe me Bedri Hamzën këtë çështje, i kam thënë a s’kemi marrëveshje, jo s’kemi marrëveshje. LDK-ja nuk ka bërë marrëveshje me PDK-në, dua të qartësojë për publikun se ne nuk kemi marrëveshje. Ato janë marrëveshje të kryetarit të komunës me partitë tjera politike, por LDK me PDK nuk kanë”, ka thënë Abdixhiku.
Rama shkarkon edhe një drejtor
Kryetari i Prishtinës, Përparim Rama, ka shkarkuar Samir Shahinin nga posti i drejtorit të Arsimit në Komunën e Prishtinës.
Shahini në një postim në Facebook ka thënë se mandati i tij ka mbaruar me vendim të kryetarit të Prishtinës.
“Të nderuar qytetarë, kolegë drejtorë, mësimdhënës e staf të shkollave, të respektuar prindër e të dashur nxënës. Me vendim të Kryetarit të Kryeqytetit, mandati im si Drejtor i Arsimit përfundon këtu. Një gjë dua ta them qartë: puna që kemi nisur nuk ishte e zakonshme dhe nuk duhet të trajtohet si e tillë”, ka shkruar Shahini në Facebook. Ai ka përmendur disa nga punët e realizuara.
“Ndryshimi në arsim nuk vjen nga vendimet e një dite. Vjen nga qëndrueshmëria në procese. Nga guximi për të mos u kthyer mbrapa. Prandaj, vazhdoni. Mos e ulni standardin. Mos e ndalni ritmin. Sepse në fund, nuk është çështje mandati. Është çështje e së ardhmes së fëmijëve tanë”, ka shkruar Shahini.
Të hënën Sokol Havolli u shkarkua nga posti i drejtorit për Investime Kapitale në Komunën e Prishtinës. Në vend të tij u emërua Zyhrije Pllana.
“Është shkarkim. Të enjten kam pasur një takim me kryetarin. Më njoftoi se dëshiron të bëjë disa ndryshime,” ka thënë Havolli për KOHËN, duke shtuar se nuk ka kërkuar sqarime për arsyet e vendimit.
Lidhja Demokratike e Kosovës të martën në një komunikatë tha se nuk ka koalicion me PDK-në në Prishtinë. Por, nuk vonoi shumë dhe kryetari i Prishtinës, Përparim Rama, njoftoi për “një bashkëpunim të ri politik në kryeqytet edhe me PDK-në”.
Ai e zyrtarizoi Besianë Musmuratin e PDK-së si nënkryetare të Komunës së Prishtinës.
Rama injoron LDK-në, zyrtarizon nënkryetaren nga PDK-ja
Kryetari i Prishtinës, Përparim Rama, ka zyrtarizuar Besianë Musmurati të Partisë Demokratike të Kosovës si nënkryetare të Komunës, duke injoruar njoftimin paraprak të LDK-së, se nuk ka marrëveshje politike me PDK-në për bashkëqeverisje në kryeqytet.
Në një shkrim në Facebook, ai ka njoftuar për fillimin e “një bashkëpunimi të ri politik në Kryeqytet edhe me Partinë Demokratike të Kosovës me qëllim zhvillimin e Prishtinës, për të mirën e qytetarëve të saj dhe të Kosovës”.
“Zotohemi për qeverisje që tejkalon interesat partiake, duke vënë në dispozicion kapacitetet profesionale dhe njerëzore për realizimin e projekteve strategjike në dobi të qytetarëve dhe të mirës publike. Nga sot, Besianë Musmurati emërohet në pozitën e Nënkryetares së Kryeqytetit, duke sjellë me vete përvojë të gjerë institucionale dhe ndërkombëtare”, ka shkruar Rama.
E paraprakisht, LDK-ja nën siglën e të cilës fitoi zgjedhjet Rama, mohoi ndonjë marrëveshje me PDK-në.