Deputetët e Kuvendit të Kosovës, që prej marrjes së mandatit, kanë arritur ta kalojnë vetëm një marrëveshje financiare me BE-në, por asnjë ligj tjetër.
Qysh prej fillimit të këtij muaji, kur u mbajt interpelanca e kryeministrit për “rastin Rikallo” dhe votimi i IPA-s 2016, nuk pati më mbledhje të Kryesisë për të thirrur seancë të re, pavarësisht se faktori ndërkombëtar kërkoi që Kuvendi të jetë prioritet i liderëve, raporton KTV.
Albert Krasniqi nga Instituti Demokratik i Kosovës thotë se për 4 vjet me radhë, Kuvendi i Kosovës ka pasur vetëm një vit punë efektive.
Ai ka përmendur ngërçin e 2014-ës, kohën e gazit lotsjellës dhe krizën e fundit deri kur u bë Qeveria e re, ndërsa tha se edhe tash angazhimi maksimal është në fushatë.
Valmir Ismaili nga “Demokracia Plus” thotë se ka moskoordinim të punës së Kuvendit. Njëherë thirren seanca urgjente natën, e pastaj ndodhin pauza prej mbi dy javësh.
Kuvendi në “pauzë”, në mes të sesionit pranveror
Sipas tij, këto vonesa do të shkaktojnë pasoja të mëdha edhe në përmbushjen e reformës evropiane, disa faza të së cilës tash do të duhej të ishin të përfunduara, siç është auditimi i financave të partive politike.
Sipas Krasniqit e Ismailit, kjo pauzë e punës së Kuvendit do të vazhdojë edhe më tutje kur dihet se shumica e komunave do të shkojnë në balotazh e gara do të jetë edhe më e nxehtë, prandaj, sipas tyre, përqendrimi komplet i klasës politike që janë pjesë e institucioneve do të jetë në garë e jo në Kuvend.
