Kuvendet e Mitrovicës së Veriut dhe Zubin-Potokut votojnë për tërheqjen nga Asociacioni i Komunave

Kuvendi Komunal i Mitrovicës së Veriut ka miratuar sot vendimin për tërheqjen nga Asociacioni e Komunave të Kosovës, me 12 vota për dhe dy vota kundër. Aty është anuluar edhe vendimi i Kuvendit Komunal të mëhershëm që kishte shumicë shqiptare, me të cilin ishin emëruar 87 rrugë.

Në seancën e kaluar, të mbajtur më 18 dhjetor, me kërkesë të kryetarit të sapozgjedhur të Mitrovicës së Veriut, Milan Radojeviq, ishte miratuar kërkesa për daljen e komunës nga AKK. Megjithatë, sot u votua sërish për të njëjtën kërkesë, pasi ajo ishte kthyer nga Ministria e Administrimit të Pushtetit Lokal, me arsyetimin se “procedura nuk kishte qenë si duhet”.

Zëvendëskryesuesja e Kuvendit Komunal në Mitrovicë të Veriut, Aida Doli Ferati, ka kritikuar mënyrën se si po trajtohet vendimi për tërheqje nga Asociacioni i Komunave të Kosovës, duke thënë se ky veprim nuk po bëhet në interes të qytetarëve.

“Nuk e di nëse ju realisht e dini se si funksionon ky Asociacion. A e dini çfarë të mira i sjell kjo në komunë nga ky asociacion? A e dini sa trajnime dhe sa çështje i merr komuna… dhe rrjedhimisht atë që e merr Komuna si ekzektuiv e pranojnë edhe qytetarët”, deklaroi Ferati.

Ajo theksoi se vendimi po shtyhet më shumë për arsye politike, duke e konsideruar të papranueshme që të përdoret retorika e “të mirës së qytetarëve”, ndërkohë që, sipas saj, veprimet nuk janë në atë drejtim.

Edhe Arbëri 18 dhj 2025 Veriu del nga Asociacioni i Komunave të Kosovës

“Ju nuk e keni për qytetarët, ju e keni politikë…”, u shpreh ajo, duke shtuar se pretendimet për shkelje procedurash nuk qëndrojnë vetëm te njëra palë.

Asamblisti i iniciativës “Veriu për të gjithë”, Marko Jakshiq, tha se mbështet vendimin dhe procedurat e ndjekura.

“Unë mbështes vendimin e marrë dhe procedurat e ndjekura, megjithatë ka paradokse kur disa komunitete kundërshtohen nga shumica. Nëse qytetarët duan të jenë pjesë e asociacioneve që ndihmojnë komunitetin, kjo mund të shqyrtohet. Vendimet duhet të merren me kujdes dhe duke respektuar mendimin e të gjithë qytetarëve”- tha ai.

Gjatë seancës së sotme në Kuvendi Komunal të Mitrovicës së Veriut është miratuar edhe propozim-vendimi për shfuqizimin e Vendimit për miratimin e listës për emërtimin e rrugëve, shesheve dhe hapësirave të tjera publike në këtë komunë, i cili ishte marrë nga përbërja e kaluar e kuvendit, më 25 gusht të vitit të kaluar, kur ishin ndryshuar emrat e 87 rrugëve.

Për shfuqizimin e këtij vendimi votuan 12 asamblistë, ndërsa dy ishin kundër.

Edhe Arbëri 18 dhj 2025 Komunat në veri votojnë për t'u tërhequr nga Asociacioni i Komunave të Kosovës

Marko Jakshiq nga iniciativa “Veriu për të gjithë”, gjithashtu theksoi se vendimi ishte marrë pa konsultime dhe se disa emra rrugësh ishin të papërshtatshëm, duke kërkuar rikthimin e gjendjes në mënyrë që të mos dëmtohej asnjë qytetar, pavarësisht komunitetit.

Jakshiq gjithashtu kërkoi që procedura të bëhet më me kujdes në mënyrë për të shmangur refuzimin e vendimit nga Ministria.

Asamblisti nga Partia Demokratike e Kosovës, Emir Azemi tha se emërtimi i rrugëve ku jetojnë komunitete të ndryshme është i ndërlikuar dhe se problemi nuk është vetëm i serbëve, por edhe i shqiptarëve.

“E kuptoj atë që po thoni, se një rrugë ku ka serbë është e vështirë të emërtohet me një emër shqiptar, por të njëjtin problem e kemi pasur edhe ne shqiptarët. Në rrugën ku unë banoj janë 23 shqiptarë të vrarë, ndër ta edhe vëllai im dhe rruga është thirr “Nemaninja””, tha Azemi.

Edhe Arbëri 25 maj 2026 Asamblistëve serbë u pengon mbishkrimi ku shprehet dashuria për Mitrovicën

Në të njëjtën ditë, edhe Komuna e Zubin Potokut ka miratuar vendimin për tërheqjen nga Asociacioni e Komunave të Kosovës (AKK).

Këtë e konfirmoi për KosovaPress asamblisti nga rradhët e Vetëvendosjes, Vedat Mehmeti, i cili tha se për këtë vendim është votuar dhe vetëm dy asamblistë kanë qenë kundër.