Kryetari Totaj dhe kuvendarët e sapozgjedhur të Prizrenit betohen më 10 dhjetor

Seanca inauguruese e Kuvendit të Komunës së Prizrenit është caktuar që të mbahet më 10 dhjetor 2021. Sipas ftesës së dërguar nga anëtari më i moshuar i përbërjes së re të KK-së së Prizrenit, në këtë mbledhje parashihet që të betohen kuvendarët e sapozgjedhur sikurse edhe kryetari, Shaqir Totaj.

“Ftoheni të merrni pjesë në mbledhjen e parë inauguruese të Kuvendit të Komunës së Prizrenit, e cila do të mbahet me datë 10 dhjetor 2021. Gjithashtu, ju njoftoj se me këtë rast do të bëni betimin dhe do të nënshkruani deklaratën solemne për marrjen e detyrës së anëtarit të Kuvendit të Komunës së Prizrenit”, thuhet në ftesën e nënshkruar nga anëtari më i moshuar i KK-së, Hanefi Muharremi.

Në rendin e ditës të propozuar për këtë mbledhje parashihet që pas fjalës mirëseardhëse të anëtarit më të moshuar, të zhvillohet edhe ceremonia e betimit të kuvendarëve si dhe betimi i kryetarit të Komunës që vjen nga radhët e PDK-së.

Më herët gjatë ditës, kryetari në detyrë i Komunës së Prizrenit, Mytaher Haskuka ka bërë të ditur se gjatë ditëve në vijim do të caktohet data për pranim-dorëzimin e detyrës së kryetarit të Prizrenit. Me këtë rast i ka uruar punë të mbarë kryetarit të ri nga radhët e PDK-së, Shaqir Totaj me kërkesën që të vazhdojnë projektet e nisura nga Ekzekutivi në detyrë.

“Tani që e kemi certifikimin e kushtëzuar të rezultateve për Komunën e Prizrenit, dhe ankesa jonë e dorëzuar në kohë me postë nuk është pranuar nga Gjykata Supreme, unë do të bisedoj gjatë ditëve në vijim për caktimin e datës për pranim-dorëzim të detyrës”, ka thënë Haskuka në rrjetet sociale, përmes një videoadresimi drejtuar qytetarëve. Këta të fundit i ka falënderuar për kulturën demokratike të treguar në zgjedhjet e fundit sikurse edhe për mbështetjen e dhënë.

Edhe Arbëri 10 dhj 2021 Totaj pas betimit zotohet për qeverisje të mirë dhe transparente

“Mandatin po e përmbyllim me një numër të madh të premtimeve që kemi përmbushur, me përmirësime në shumë drejtori dhe shërbime të reja, të cilat i ofron Komuna e Prizrenit. Në këtë aspekt, kryetarit të ri i uroj punë të mbarë dhe vazhdim të projekteve që kemi nisur e që duhet të përfundojnë gjatë muajve në vijim”, ka deklaruar Haskuka.

Në vijim ka elaboruar projektet e realizuara e që janë në vijim e sipër gjatë mandatit të tij qeverisës.

“Unë, Mytaher Haskuka, këtë rrugëtim kam filluar me zemër, e do të vazhdoj që të kontribuoj me zemër për zhvillimin e qytetit tim, duke ndjekur nga afër çdo zhvillim e çdo projekt që është e do të jetë në të mirë të qytetarëve të Prizrenit. Të gjithë juve që më besuat, e më keni përkrahur gjatë gjithë mandatit, përkundër shumë e shumë vështirësive, ju falënderoj përzemërsisht”, ka përfunduar Haskuka.

Kryetari i sapozgjedhur i Komunës së Prizrenit, Shaqir Totaj të mërkurën pas certifikimit të rezultatit të zgjedhjeve të raundit të dytë nga ana e KQZ-së pati vlerësuar se ka ardhur koha për të punuar për Prizrenin e të ardhmes si dhe përmirësimin e jetesës së qytetarëve. Sipas tij, me vendimin e fundit të KQZ-së është vërtetuar se zgjedhjet e 14 nëntorit në këtë komunë kanë qenë demokratike dhe kanë pasqyruar vullnetin e qytetarëve.

Edhe Arbëri 6 dhj 2021 Bëhet pranim-dorëzimi i detyrës së kryetarit të Prizrenit

Komisioni Qendror i Zgjedhjeve (KQZ), një ditë më parë mes polemikave ka certifikuar rezultatet përfundimtare të raundit të dytë të zgjedhjeve për kryetar të Prizrenit dhe Kllokotit.

Sipas rezultateve të publikuara në ueb faqen e KQZ-së në raundin e dytë të zgjedhjeve për kryetar të Prizrenit, Shaqir Totaj i PDK-së ka marrë 27 mijë e 689 vota apo 50,93%, derisa Mytaher Haskuka i LVV-së ka marrë 26 mijë e 680 vota apo 49,07%.