Krejt çfarë ndodhi sot në seancën e dështuar gjyqësore ndaj deputetëve të Kosovës

Pak minuta ka zgjatur edhe një herë tjetër seanca ndaj deputetëve të Kuvendit të Kosovës, të akuzuar për gjuajtje të gazit lotsjellës në këtë institucion, raporton KTV. Përsëri shkas i mosmbajtjes së seancës gjyqësore, ka qenë mungesa e të akuzuarve Albin Kurti e Donika Kadaj.

Në seancë të pranishëm, sikurse herën e kaluar, ka qenë Albulena Haxhiu e Faton Topalli.

Për Kurtin e Kadajn, ka pasur urdhër për sjellje me detyrim, por kryetari i trupit gjykues ka thënë se nuk e di pse nuk ka vepruar Policia.

Policia e Kosovës ka thënë për KTV-në se ata i kanë kërkuar deputetët në disa lokacione por nuk i kanë gjetur aty dhe për këtë kanë njoftuar gjyqtarin e rastit.

Vetëm një seancë ka arritur të mbahet brenda gati 2 vjetëve në këtë rast dhe kjo ka qenë kur të akuzuarit ishin në arrest shtëpiak e paraburgim. Herëve të tjera, ata nuk i janë përgjigjur ftesës së Gjykatës, derisa ende nuk ka nisur marrja në pyetje e dëshmitarëve.

Edhe të hënën aty janë paraqitur Bekim Haxhiu dhe deputetet e PDK-së, që janë të dëmtuara në këtë rast, Blerta Deliu Kodra e Flora Brovina. Seanca tjetër është caktuar për në fund të nëntorit dhe përsëri Gjykata ka lëshuar urdhër për sjellje me detyrim për Kurtin e Kadajn.