Krasniqi-Hajdari: Vetëm 17% e grave në Kosovë janë të punësuara

Judita Krasniqi-Hajdari, menaxhere e projekteve në “Demokracia për Zhvillim” ka thënë se vetëm 17 për qind e grave në Kosovë llogaritet se janë të punësuara.

Krasniqi-Hajdari ka thënë të mërkurën në “60 Minuta” të KTV-së se pjesëmarrja aktive e grave në tregun e punës në Kosovë është diku rreth 20 pë qind, që sipas saj, është më e ulëta në rajon.

“Në Kosovë kemi diku rreth 78% të grave joaktive, do të thotë, jashtë tregut të punës, të dhënat e vitit 2021 tregojnë se vetëm 17% e grave janë të punësuara, kurse pjesëmarrja aktive e grave në tregun e punës është diku rreth 20% që është më e ulëta në rajon”, ka thënë Krasniqi-Hajdari, derisa ka folur për një hulumtim të bërë lidhur me pjesëmarrjen e grave në tregun e punës, në vendet e Ballkanit Perëndimor.

Sipas saj, Kosova gjendet në pozitën më të keqe sa i përket pjesëmarrjes së grave në tregun e punës.

Ajo ka thënë se Kosova ka politika që nuk e lejojnë pjesëmarrjen e grave në tregun e punës.

“Në Kosovë aktualisht problemet me të cilat përballemi është çështja e punës së papaguar: përkujdesja ndaj fëmijës dhe familjes. Pjesa më e madhe e grave joaktive në tregun e punës, nuk angazhohen në tregun e punës për shkak të përkujdeset ndaj fëmijëve dhe familjes. Gjithashtu edhe mungesa e qasjes së drejtë institucionale ndaj politikane gjinore. Edhe gratë që janë të punësuara, përqindja më e madhe e tyre janë të fokusuara në sektorin e shëndetësisë dhe arsimit. Në aspektin tradicional është shumë më e përshtatshme, sesa profesione të tjera që shpeshherë konsiderohen të mos jenë të duhura për gratë”, ka thënë Krasniqi-Hajdari.