Kosovës i dhurohen 20 ventilatorë mobilë

Programi i Kombeve të Bashkuara për Zhvillim (UNDP) në Kosovë ia ka dorëzuar Qendrës Klinike Universitare të Kosovës 20 ventilatorë mobilë, të blera me fonde të qeverive të Norvegjisë, Zvicrës e Luksemburgut, si reagim ndaj pandemisë së koronavirusit.

Sipas njoftimit nga Ministria e Shëndetësisë, ventilatorët do të ngrisin kapacitetin e kujdesit intensiv të sektorit shëndetësor të Kosovës.

Kontributi i përgjithshëm nga qeveritë e Norvegjisë, Zvicrës dhe Luksemburgut për blerjen e ventilatorëve mobilë Vg70 është 1.17 milion dollarë, në partneritet me UNDP-në, thuhet në njoftim të MSH-së.

Me këtë mbështetje UNDP-ja ka blerë 40 ventilatorë, 20 prej të cilave u dorëzuan sot, e 20 të tjerë pritet të dorëzohen deri në fund të muajit qershor.

Ministri i Shëndetësisë, Armend Zemaj, ka falënderuar qeveritë e tri shteteve dhe UNDP-në për mbështetjen duke thënë se “s’ka dhuratë më të mirë për qytetarët e Kosovës në ditën e lirisë sesa një asistencë e rëndësishme për pacientët”.

UNDP ka bërë të ditur se ventilatorët janë prodhuar në Kinë, të certifikuar me certifikatën e BE-së dhe me sigurimin e cilësisë nga Njësia Globale e Prokurimit e UNDP-së në Kopenhagë.