Kosova me vetëm 792 zjarrfikës, mosha mesatare e tyre 47 vjeç

Në Kosovë aktualisht janë vetëm 792 zjarrfikës, numër ky që po konsiderohet tejet i ulët. Problem po vlerësohet edhe mosha mesatare e tyre që është 47 vjeç.

Në bazë të rregullores për strukturën organizative të njësive profesionale të zjarrfikësve dhe shpëtimit është paraparë që caktimi i numrit të tyre, mund të bëhet edhe sipas numrit të banorëve dhe atë për çdo 1500 banorë së paku një zjarrfikës profesional. Për t’u arritur numri i nevojshëm sipas rregullores duhet të punësohen edhe 400 zjarrfikës.

Përfaqësuesi i Agjencisë për Menaxhimin e Emergjencave, Nehat Koçinaj, në emisionin “Betimi për Drejtësi”, tha se janë të vetëdijshëm që ky numër i zjarrfikësve është i pamjaftueshëm për të garantuar siguri për qytetarët, por që arsyetohet se edhe tek kapacitetet e zjarrfikësve ka ndikuar mosdefinimi i kompetencave me nivelin lokal.

“Numri total i zjarrfikësve shpëtues në nivel republike tani është rreth 800, me e thënë saktësisht shifrën e fundit të cilën e mora sot para një ore janë 792 zjarrfikës shpëtues në të gjithë komunat e Kosovës, që është numër i pamjaftueshëm. Gjithashtu e përmenda një standard ose normë e cila është e aplikueshme në vendet e zhvilluara që i bie një zjarrfikës në 1 mijë e 500 banorë, tek ne do të thoshin një numër goxha më i madh se ai që është sot, por sipas përllogaritjeve dhe vlerësimit të rrezikshmërisë në nivel vendi nga ky aspekt ne konsiderojmë se kapaciteti i zjarrfikësve minimumi i mungojnë edhe 400 zjarrfikës shpëtues profesional”, tha ai në emisionin “Betimi për Drejtësi” në KTV.

Latif Zeka, komandant i Brigadës së Zjarrfikësve të Prishtinës, tha se përveç kryeqytetit ata mbulojnë edhe tri komuna të tjera, Fushë Kosovën, Obiliqin dhe Graçanicën, e të gjitha këto komuna mbulohen me vetëm 99 zjarrfikës.

Ai bëri të ditur se në këtë Brigadë janë 22 vende të lira për zjarrfikës, por që konkursi i fundit për pranim të zjarrfikësve të ri është hapur para 18 viteve.

Edhe Arbëri 29 kor 2023 Kosova me qindra zjarrfikës mangët

“Është problem që nuk mund të pranojmë punëtorë të ri. Këtu i kemi 22 vende të lirë edhe ende nuk është hapur konkursi nuk po mund me u marr vesh ose me u dakordu mes Agjencionit të Menaxhimit të Emergjencave në kuadër Ministrisë së Punëve të Brendshme edhe komunave se kush me e hap konkursin. Ky është një problem, këtë vit pesë kemi me shku në pension nuk është paraparë të pranohet asnjë punëtorë. Që 18 vite asnjë punëtorë i ri nuk ka ardhur tek ne…. Është një problem shumë i madh, pse po them është një problem i madh, vetëm Prishtina duhet t’i ketë 150 zjarrfikës”, tha ai në emisionin “Betimi për Drejtësi” në KTV.

Për më shumë ndiqeni emisionin “Betimi për Drejtësi”, mbi statusin e zjarrfikësve në Kosovë.