Kosova e Kroacia për fuqizim të bashkëpunimit në shëndetësi

Ministri i Shëndetësisë i Republikës së Kosovës, Arben Vitia, priti në takim ambasadoren e Republikës së Kroacisë në Kosovë, Danijela Barishiq.

Njoftohet se gjatë takimit me Ambasadoren Barishiq, ministri Vitia ka falënderuar shtetin e Kroacisë për ndihmën e dhënë Kosovës në rrafshin politik dhe në sektorin e shëndetësor dhe ka shprehur përkushtimin për fuqizimin e këtij bashkëpunimi.

“Kosova dhe Kroacia kanë marrëveshje bashkëpunimi në shëndetësi dhe bashkëbiseduesit kanë shprehur gatishmërinë për fuqizimin e këtij bashkëpunimi në rrafshin e avancimit të shërbimeve të reja dhe ngritjes së nivelit të profesionistëve shëndetësor me qëllim që qytetarëve të vendit t’u sigurohen shërbime shëndetësore cilësore e të sigurta”, thuhet në njoftimin e dërguar mediave.