Kosova dënon veprimet e Serbisë për nderimet ushtarake ndaj kriminelit të luftës Mlladiq

Kryenegociatori i Kosovës me BE-në dhe Koordinator Kombëtar për Instrumentin e Reformave dhe Rritjes, Jeton Zulfaj, ka thënë se pritja që Serbia i ka bërë trupit të të dënuarit për gjenocid Ratko Mlladiq dhe synimi për ta varrosur atë me nderime shtetërore është e gabuar. 

Ai në adresimi e tij në seancën e punës të ministrave të Çështjeve Evropiane për zgjerimin e BE-së me vendet kandidate dhe potencialisht kandidate që është mbajtur në Dublin, ka thënë se kjo “do të jetë njollë mbi ndërgjegjen tonë nëse nuk themi asgjë”.

“Sot, mes nesh, ndodhet Ministri i Serbisë për Integrime Evropiane, qeveria e së cilit dje e priti me nderime ushtarake trupin e një personi të dënuar për gjenocid, krimin më të rëndë që njeh njerëzimi, dhe synon që këtë fundjavë ta varrosë atë me nderime shtetërore. Kjo është e gabuar. Dhe, do të jetë njollë mbi ndërgjegjen tonë nëse nuk themi asgjë”, ka theksuar Zulfaj. 

Mlladiq vdiq më 27 gusht në moshën 84-vjeçare në burgun e Hagës, ku po vuante dënimin me burgim të përjetshëm për krime lufte në Bosnjë, përfshirë përgjegjësinë për masakrën e Srebrenicës.

Ai njihej ndryshe si “Kasapi i Bosnjës”. 

Serbia ka caktuar mbledhje komemorative më 5 shtator, ndërsa varrimi do të bëhet më 7 shtator.