Konjufca uron Xhaferin: Arritje e rëndësishme për të gjithë shqiptarët

Kryetari i Kuvendit të Kosovës, Glauk Konjufca, i ka uruar Talat Xhaferit marrjen e pozitës së kryeministrit të Maqedonisë së Veriut.

Përmes një postimi në Facebook, Konjufca ka thënë se kjo është arritje e rëndësishme për të gjithë shqiptarët.

“Deri dje ai udhëhoqi shkëlqyeshëm Kuvendin e këtij vendi mik. Kryeministri shqiptar, sado me kompetenca dhe kohë të limituar, thyen një barrierë të perceptimit për këdo. Urojmë që kjo përgjegjësi e re t'iu shërbejë të gjithë qytetarëve pa dallim”, ka shkruar ai.

Konjufca ka thënë se bërja e Xhaferit kryeministër deri në realizimin e zgjedhjeve në Maqedoninë e Veriut vjen si mundësi që pjesëmarrja dhe integrimi i plotë i shqiptarëve të vlerësohet si synim i pashmangshëm, aq sa edhe përparimtar, prej të cilit përfiton më së miri vetë Maqedonia e Veriut.

“Urime z. Xhaferi dhe suksese në detyrën tuaj, duke shpresuar dhe besuar se kjo do t’i hapë rrugën ndryshimeve të përparimit të vazhdueshëm politik”, ka shkruar ai.