Dorëheqje të qeveritarëve dhe zyrtarëve të institucioneve publike kanë kërkuar përfaqësuesit e shoqërisë civile në konferencën e organizuar të premten, në kuadër të “Javës kundër korrupsionit 2022”.
Hulumtuesja e Institutit të Kosovës për Drejtësi (IKD), Medina Kadriu, ka numëruar zyrtarë që po vazhdojnë mandatin e tyre, pavarësisht që Kurti kishte deklaruar se në qeverinë e tyre nuk do të ketë persona me aktakuzë. Kadriu ka thënë se Qeveria e Kosovës përbëhet nga pesë zyrtarë që kanë probleme me ligjin, të cilat lidhen me hedhjen e gazit lotsjellës. E në listë ka edhe deputetë e kryetarë të komunave.
“Ministrja e MINT, Rozeta Hajdari, po akuzohet nga prokurori i shtetit për mosraportim ose raportim të rremë të pasurisë.... Në kundërshtim me premtimet qeverisëse, sot znj. Hajdari mban pozitën e Ministrisë përkundër që e njëjta është e akuzuar për korrupsion.
Në grupin e personave që kanë probleme me ligjin, por se jo për korrupsion, bënë pjesë edhe kreu i Qeverisë, Kurti, i cili është i dënuar për përdorim të armës apo mjetit të rrezikshëm dhe pengim i personit zyrtar gjatë kryerjes së detyrave zyrtare”, ka thënë Kadriu.
Hulumtuesi tjetër, Ramiz Durmishi, ka treguar se janë 11 persona apo 9,16% e përfaqësuesve të popullit në Kuvend që kanë aktakuzë aktive. Nga VV-ja ka thënë se është Glauk Konjufca, Mimoza Kusari-Lila, Artan Abrashi, Valon Ramadani, Jetmire Venezi, Salih Zyba dhe Fitore Dalipi, nga PDK-ja Xhavit Haliti, nga AAK- ja, Pal Lekaj dhe Time Kadrijaj, ndërsa nga grupi multietnik, Samra Ilijazi.
“Tre prej deputetëve që janë, ushtrojnë mandatin e tyre, përballen me vepra korruptive, pra vepra penale që kanë të bëjnë me korrupsionin, ndër to 2 deputete vetëm se kanë përfunduar gjykimin ndaj tyre. Mimoza është e liruar nga akuza, Venezi është dënuar në shkallë të parë dhe rasti i saj është ende në Gjykatën e Apelit. Me aktakuzë për korrupsion përballet edhe deputeti Pal Lekaj, pra edhe pse shumë nga deputetët që i përmendëm veprat e tyre lidhen shumë me hedhjen e gazit lotsjellës në Parlament. Katër nga deputetët akuzohen për vepra penale, gjykimet e tyre janë për vepër penale/korruptive dhe të njëjtit vazhdojnë të jenë deputetë të Kuvendit”, ka bërë të ditur Durmishi. Ai ka theksuar më tej se mosdorëheqja e këtyre personave i shkakton dëme shoqërisë sonë.
Në konferencën që titullohet “Qeverisje me duar të pastra, u bë e ditur se tri komuna të Kosovës udhëhiqen nga persona të cilët kanë probleme me ligjin, sipas gjetjeve të IKD-së: Komuna e Pejës nga Shpejtim Bulliqi, e Istogut me Zenun Elezajn dhe Kamenica me Kadri Rahimaj.
Në kuadër të “Javës Kundër Korrupsionit”, që ka nisur më 5 dhjetor”, koalicioni i OJQ-ve ka organizuar shumë aktivitete, ku ndër të tjera janë prezantuar raporte që argumentojnë problemet dhe sfidat e institucioneve përgjegjëse në luftimin e korrupsionit.
Pjesë e koalicionit të OJQ-ve “Bashkë kundër korrupsionit” janë: Instituti i Kosovës për Drejtësi (IKD), Grupi për Studime Juridike dhe Politike (GLPS), Lëvizja Fol, Iniciativa për Progres, Çohu dhe Columbus. Motoja e “Javës kundër korrupsion për vitin 2022” është “Bashkë Kundër Korrupsionit”.
