Këngëtarja Adelina Thaçi, i është bashkuar Lidhjes Demokratike të Kosovës (LDK).
Për këtë ka njoftuar kryetari i LDK-së, Lumir Abdixhiku.
“Adelina Thaçi Meta, një nga zërat më të fuqishëm dhe më të dashur të skenës muzikore shqiptare, nga sot i bashkohet Lidhjes Demokratike të Kosovës. Me mbi dy dekada karrierë të suksesshme në muzikën klasike dhe atë moderne, Adelina është një prej emrave më përfaqësues të kulturës sonë. Soprano profesionale, këngëtare e suksesshme e muzikës pop dhe profesoreshë me përvojë të gjatë në vokal, ajo ka shënuar arritje që e vendosin ndër artistet më të respektuara të vendit dhe rajonit”, ka shkruar ndër të tjera Abdixhiku.
Abdixhiku ka thënë se ajo po e hap një kapitull të ri të angazhimit qytetar e politik.
“Ajo i bashkohet LDK-së duke sjellë me vete profesionalizëm, integritet, humanizëm dhe një reputacion që na nderon. LDK fiton sot një kuadër të çmuar një artiste që beson në vlerat tona, në rrugëtimin tonë dhe në misionin për të ndërtuar një Kosovë me më shumë kulturë dhe zhvillim”, ka shkruar ai.