KEDS-i e konsideron të suksesshëm privatizimin

Kompania Kosovare për Distribuim me Energji Elektrike (KEDS) e ka konsideruar të suksesshëm procesin e privatizimit të këtij shërbimi, pas kritikave e kërkesave për rinacionalizim.

KEDS-i po përballet me shumë kritika ditëve të fundit pas nisjes së reduktimeve të rrymës.

Protestat e së hënës, KEDS-i ka thënë e i kupton dhe i respekton, teksa ka treguar arsyet përse, sipas tij, Kosova është në krizë. KEDS-i ka thënë se me punën e vet ka arritur t’i heqë reduktimet e mëhershme.

“Këtë vit po përballemi me krizë globale të rritjes së çmimeve, rritjes enorme të konsumit dhe rënies së prodhimit. Këta faktorë prekin tërë sistemin elektro-energjetik, pjesë e të cilit janë edhe konsumatorët. Ne si kompani jemi të shqetësuar për këtë. Madje, për disa muaj me radhë e kemi bartur krizën në supet tona, pa u afektuar konsumatori aspak, deri sa i shterëm të gjitha resurset tona. Si kompani jemi në vitin e 9 të operimeve. Që nga fillimi i operimeve tona kemi hequr planin e reduktimeve të njohur si Kategorizimi ‘ABC’. Vetëm kujtojeni se si ka qenë furnizimi me rrymë vitin e kaluar, krahasuar me këtë vit!? Ky është shembulli më i mirë se privatizimi ka qenë i suksesshëm dhe ne si kompani jemi krenar me atë që kemi arritur”, ka thënë KEDS-i.

Kjo kompani ka thënë se ka investuar mbi 200 milionë euro në sistem. Megjithatë, ditëve të fundit është raportuar për djegie të disa trafove si pasojë e mbingarkesës.

“Kemi investuar gati 200 milionë euro në sistem dhe operimi ynë i përgjithshëm sot është shumë më efikas. Këto investime kanë rritur në mënyrë të prekshme kualitetin e shërbimeve për qytetarët e bizneset në të gjithë Kosovën. Kur e kujtojmë gjendjen që e trashëguam dhe pasi të merren në konsideratë të gjitha projektet e realizuara deri tani, atëherë privatizimi i KEDS-it, s’ka si quhet ndryshe, pos një storie suksesi. Edhe këto ditë kemi bërë çdo gjë që është e mundur që të kalohet sa më lehtë kjo situatë. Kemi dhënë rekomandime dhe mbesim të gatshëm që të luajmë rolin tonë në këto rrethana”, thuhet në reagim të KEDS-it.

Kjo kompani ka thënë se është e gatshme për bashkëpunim me akterët tjerë për të menaxhuar krizën.

Edhe Arbëri 1 muaj më parë Sinanaj: Qytetarët i kanë paguar investimet e KEDS-it përmes tarifave të energjisë elektrike

“Është koha që tërë energjinë ta përqendrojmë në tejkalimin e kësaj situate, në vepra konkrete, e jo për sulme që cenojnë kredibilitetin e kompanisë jashtë dhe brenda vendit dhe mohojnë të arriturat e kompanisë ndër vite”, thuhet në fund të komunikatës.

Reduktimet kanë nisur të largohen dy ditët e fundit.

Privatizimi i këtij shërbimi ishte kritikuar ashpër ndër vite nga Lëvizja Vetëvendosje që tash është në pushtet.