IML-ja thotë se ende s’ka raport preliminar për vdekjen e Agon Zejnullahut

Instituti i Mjekësisë Ligjore (IML) ka mohuar “publikimet në media që pretendojnë se ka dalë një raport preliminar lidhur me shkaqet e vdekjes së 27-vjeçarit Agon Zejnullahu”, i cili ndërroi jetë të hënën në Lipjan, pak pas arrestimit nga Policia e Kosovës.

Në një deklaratë në Facebook, IML-ja ka bërë të ditur se autopsia është kryer me urdhër të Prokurorisë së Shtetit dhe se në këtë proces kanë marrë pjesë edhe zyrtarë të caktuar nga Policia e Kosovës.

“Me përgjegjësi morale dhe profesionale deklarojmë se nga IML-ja nuk ka dalë ndonjë raport i tillë, dhe ky lajm është i pavërtetë”, thuhet në reagimin e Institutit.

Sipas IML-së, aktualisht janë duke u kryer analizat histopatologjike dhe toksikologjike të mostrave të marra gjatë autopsisë, në mënyrë që të hartohet sa më shpejt raporti përfundimtar.

“Jemi në kontakt të vazhdueshëm me Prokurorinë e Shtetit që e ka rastin dhe po bëjmë përpjekje maksimale për përfundimin e ekspertizës mjeko-ligjore”, thuhet në njoftim.

Ndërkohë, Prokuroria Themelore në Prishtinë ka kërkuar caktimin e masës së paraburgimit prej një muaji për pesë zyrtarë policorë të dyshuar për përfshirje në rast.

Edhe Kronikë 23 kor 2025 Themelorja edhe në rivendosje cakton paraburgim për pesë policët në Lipjan

Agon Zejnullahu humbi jetën në orët e para të së hënës, pasi ishte arrestuar me dyshimin se po sulmonte kalimtarë dhe automjete në rrugët e Lipjanit. Familja e tij pretendon se ai ka ndërruar jetë si pasojë e dhunës së ushtruar nga zyrtarët policorë gjatë arrestimit.

Pesë zyrtarët policorë janë ndaluar për 48 orë dhe po hetohen për veprën penale “vrasje nga pakujdesia”.