IKD: Ndryshimi i përbërjes së Komisionit për provimi e jurisprudencës është i kundërligjshëm

Instituti i Kosovës për Drejtësi ka vlerësuar se vendimi i Qeverisë për ndryshimin e përbërjes së Komisionit për dhënien e provimit të jurisprudencës është i kundërligjshëm, pasi thuhet se anëtarët aktualë kanë mandat deri në muajin dhjetor të këtij viti. 

Në një reagim në Facebook  IKD-ja ka vlerësuar se Qeveria nuk ka bazë ligjore për ndërprerjen e mandatit.

IKD-ja i ka bërë thirrje Kuvendit që të mos e votojë vendimin që Qeveria e miratoi në mbledhjen e mbajtur të hënën.  

“Ky vendim cenon ligjshmërinë, sigurinë juridike dhe pavarësinë e Komisionit, ndërsa ngre dyshime edhe për konflikt interesi në përbërjen e re të propozuar. IKD i bën thirrje Kuvendit që të mos e votojë këtë vendim. Kuvendi nuk duhet të legjitimojë një vendim që është marrë pa bazë ligjore dhe që cenon besueshmërinë, sigurinë juridike dhe pavarësinë e funksionimit të këtij Komisioni”, thuhet në reagim.

Edhe kryetari i Gjykatës Supreme të Republikës së Kosovës, njëherësh kryetar i Komisionit të deritashëm për dhënien e provimit të jurisprudencës, Fejzullah Rexhepi, e ka quajtur joligjor dhe kundërkushtetues, vendimin e Qeverisë për emërimin e përbërjes së re të këtij Komisioni. 

Vendimi është marrë të hënën në mbledhjen e Qeverisë, me arsyetimin se ka pasur ankesa ndaj Komisionit dhe mungesë transparence dhe profesionalizimi në arsyetimin e rezultateve.