I është dhënë lamtumira e fundit, ish-profesorit universitar Bektesh Bekteshi, i cili ka vdekur sot, në moshën 75-vjeçare.
Bekteshi, doktor i shkencave të pedagogjisë në Universitetin e Prishtinës, njihej si punëtor i palodhur i arsimit shqip.
Dr. sc. Bektesh Bekteshi ishte lindur në Zhegër të Gjilanit, më 1 janar të vitit 1943, në një familje të nderuar në Malësinë e Karadakut.
Shkollën fillore e kreu në vendlindje, ndërsa atë të mesme (Normalen), në Gjilan, në vitin shkollor 1963/64. Një kohë Bektesh Bekteshi ishte mësues në Shkollën fillore të Pidiqit. Më vonë punoi arsimtar i ciklit të lartë në Shkollën fillore, tash “Agim Ramadani” në Zhegër. Ka punuar me ditar edhe në Shurdhan e Pasjan.
Në vitin akademik 1964/65 regjistrohet në Fakultetin Filozofik – Dega e Pedagogjisë në Prishtinë, të cilin fakultet e kryen në vitin 1969. Pas studimeve, një vit punoi në Qendër për Punë Sociale në Prishtinë, e pastaj filloi të punojë si profesor në Gjimnazin “Sami Frashëri” dhe në atë të Lipjanit.
Edhe
Shuhet akademik Idriz Ajeti në moshën 102 vjeçare
Në vitin 1972, Bektesh Bekteshi zgjidhet asistent në Degën e Pedagogjisë të Fakultetit Filozofik të Prishtinës për lëndën “Metodologjia e pedagogjisë me statistikë”.
Studimet pasuniversitare i regjistroi dhe i mbaroi në Fakultetin Filozofik të Universitetit të Zagrebit, ku në qershor të vitit 1976 magjistroi në temën “Ndryshimet e ngarkesës së nxënësve të shkollave fillore në kalim nga mësimi klasor në atë lëndor”. Këtë materie studimore, pas pak kohe e ka botuar si libër të kësaj natyre.
Bektesh Bekteshi ka doktoruar në temën “Komponenta kohore dhe përmbajtësore e ngarkesës së nxënësve të shkollave fillore”.
Ndërkohë merr titullin e ligjëruesit, pastaj, pas mbrojtjes ë doktoratës, në atë të docentit (1987) e pastaj në titullin e profesorit inordinar (1994) dhe më 1999 në atë të profesorit ordinar për lëndën e përmendur më parë. Ai disa vjet ishte ligjërues i lëndëve: “Metodika e dituri natyre dhe shoqërie” në SHLP “Skënderbeu” në Gjilan; ligjërues i Pedagogjisë në Fakultetin e Filozofisë – Dega e Historisë dhe Filozofi – Sociologji të UP-së, ligjërues i lëndës Metodologji e hulumtimeve shkencore me statistikë në FKF dhe në shkallën e tretë të këtij fakulteti.
Ligjëroi në Universitetin e Tetovës. Ishte anëtar dhe kryetar i Kolegjiumit të shkallës së tretë në Fakultetin e Filozofisë – Dega e Pedagogjisë etj.
Vazhdimisht është marrë me publikimin e punimeve shkencore nëpër revista dhe gazeta, si janë: “Shkendija”, “Libri shkollor”, “Për prindërit”, “Zëri i rinisë”, “Rilindja”, “Pionieri” e në revista të tjera. Ka botuar me dhjetëra punime profesionale – shkencore. La në dorëshkrim disa vepra. Ka bërë disa recensione të teksteve shkollore.
Bëri përgatitjen e shumë emisioneve arsimore në RTV të Prishtinës.
Edhe
Ndahet nga jeta profesori e gjuhëtari Jashar Kabashi
Bekteshi është varrosur sot në varrezat e qytetit në Dragodan të Prishtinës.
Nesër, (e premte) në Fakultetin e Edukimit të Universitetit të Prishtinës, në orën 11:00 do të mbahet mbledhje komemorative.
