Hovenier: Asociacioni të jetë në përputhje me Kushtetutën aktuale

Ambasadori i Shteteve të Bashkuara të Amerikës në Kosovë, Jeff Hovenier, ka thënë se Asociacioni i komunave me shumicë serbe duhet të formohet në përputhje me Kushtetutën aktuale të Kosovës.

Hovenieri ka deklaruar se Asociaconi duhet të jetë në përputhje me vendimin e Gjykatës Kushtetuese të marrë në vitin 2016 dhe se nuk ka kompetenca ekzekutive.

“Shtetet e Bashkuara besojnë se pavarësisht se çfarë asociacioni të themelohet duhet të jetë në përputhje me Kushtetutën aktuale të Kosovës, pra pa ndryshime kushtetuese. Duhet të jetë në përputhje me vendimin e Gjykatës Kushtetuese të vitit 2016. Duhet të jetë në përputhje me angazhimin e Bashkimit Evropian se nuk ka kompetenca ekzekutive”, ka thënë ai në një intervistë për “Zërin e Amerikës”.

Hovenieri më tej ka thënë se ka mënyra që përmes Asociacionit të përmirësohet funksioni i shtetit të Kosovës.

“Ai duhet të jetë në përputhje me një dokument publik të hartuar me shumë kujdes nga Këshilltari i Departamentit të Shtetit, Derek Chollet dhe i dërguari ynë i posaçëm për Ballkanin, Gabriel Escobar, që i shpalosën të gjitha këto. Ne i sfidojmë ata që thonë se për nga natyra e tij, asociacioni i komunave me shumicë serbe është i dëmshëm për funksionimin e mirë të shtetit të Kosovës. Ne besojmë fuqimisht se ka mënyra për ta bërë këtë asisoj që në të vërtetë përmirëson funksionin e shtetit të Kosovës duke përmbushur gjithashtu rolin kritik të trajtimit të shqetësimeve reale të komunitetit etnik serb në Kosovë”, ka theksuar ai.