Kryeministri i Kosovës, Avdullah Hoti, ka thënë se po përgatisin udhëzuesin për mënyrën e organizimit të vitit të ri shkollor nga 1 shtatori.
Hoti shkruan se vendimi për hapjen e shkollave do të varet nga gjendja epidemiologjike.
“Në procesin e vendimmarrjes do të përfshihen plotësisht komunat, të cilat do të kenë përgjegjësi që të zbatojnë udhëzimet. Gjatë javës që vjen, do të jemi në kontakt me kryetarët e komunave dhe drejtorët për arsim për të diskutuar modalitetet e mundshme të fillimit të vitit shkollor”, ka shkruar Hoti në Facebook, duke shtuar se po shqyrtohen platformat e ndihmesës për stafin mësimdhënës dhe nxënësit.
“Jemi duke shqyrtuar edhe platformat e ndryshme të ndihmesës për stafin mësimdhënës dhe nxënësit, sidomos në organizimin më të mirë të punës praktike në arsimin e mesëm professional”.
Që nga marsi, kur në vend u paraqitën rastet e para me COVID-19, mësimi është mbajtur online.
