Drejtori i Hortikulturës, Isak Rakovica, ka thënë se ndërmarrja ka mungesë të punëtorëve, por megjithatë ajo kultivon çdo pranverë 1 milion e 200 mijë lule për t’i mbjellë në zonat e gjelbëruara të Prishtinës.
Rakovica ka thënë në emisionin “Sot” në KTV të martën se për kultivimin e kësaj sasie të luleve përkujdesen 22 punëtorë, derisa ka shtuar se ndërmarrja ka mungesë të 50 punëtorëve.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Gjatë sezonit dimëror në lulishten e ndërmarrjes 22 punëtorë kujdesen për kultivimin e luleve dhe në fillim të pranverës ne dalim me rreth 1 milionë e 200 mijë lule sezonale dhe shkurre. Deri në fund të qershorit, ne arrijmë që me prodhimet tona t’i plotësojmë kriteret e parqeve. Jemi në mungesë të 50 punëtorëve fizikë. Me këtë numër të punëtorëve duhet t’i kryejmë të gjitha këto obligime”, ka thënë Rakovica.
Sipas tij, Prishtina i ka 260 hektarë sipërfaqe gjelbëruese dhe ekziston edhe një problem me uzurpuesit e hapësirave rreth banesave të tyre të banimit, kryesisht në lagjet Dardani dhe Ulpianë.
“Kemi pjesë në Dardani e Ulpianë ku i kemi të uzurpuara pjesët gjelbëruese me rrethoja përballë objekteve të tyre të banimit. Ne po arrijmë me drejtorinë e Inspeksionit dhe të Shërbimeve Publike largimin e këtyre urzurpuesve”, ka thënë Rakovica, duke shtuar se gjendja e mirë nuk ekziston as me mirëmbajtjen e varrezave në fshatra.