Nënkryetari i LDK-së, Lutfi Haziri, ka thënë se ndarja e drejtë dhe e balancuar e pushtetit mes Vetëvendosjes dhe Lidhjes Demokratike të Kosovës, ku VV-ja do të udhëhiqte me Qeverinë e LDK-ja me Kuvendin, do t’i jepnin fuqi një koalicioni potencial mes dy partive.
Sipas tij, kjo ndarje do t’i jepte mirëbesim e shkathtësi për t’u përballur me situatën politike karshi faktorit ndërkombëtar.
“Një ndarje e drejtë dhe e balancuar e pushtetit mbi parimet e mirëbesimit do të bënte që programi qeverisës, me VV’në udhëheqëse të Qeverisë e LDK’në udhëheqëse të Parlamentit, do t’i jepnin fuqi koalicionit. Do t’i jepnin mirëbesim dhe shkathtësi për t’u përballur me situatën politike, pasi agjenda politike është jashtëzakonisht e rëndë karshi faktorit ndërkombëtar, karshi opozitës së organizuar, karshi Qeverisë së re”, ka shkruar ai në Facebook.
Haziri e ka quajtur LDK-në gardiane të interesave të Kosovës, teksa ka shtuar se kjo parti të tjerët i sheh si rivalë politikë e jo si armiq.
“E kaluara në bashkëqeverisje ka dëshmuar qartë se ne jemi gardianë të interesave të kësaj republike përmes LDK’së dhe vetëm përmes LDK’së. Partitë e tjera politike nuk i shohim si armiq, por si rivalë politikë”, ka shtuar Haziri.
Tutje Haziri ka thënë se duhet të punohet shumë që në vend të kthehet besimi i qytetarëve.
“Do të ketë nevojë të punohet 24 orë në ditë e 7 ditë në javë në mënyrë që të kthehet besimi i qytetarëve, mërgimtarëve dhe ndërkombëtarëve në republikë”, ka shtuar Haziri.
Teksa ka apeluar për durim, Haziri ka thënë se “këto konsultimet e brendshme na mundësojnë që të eliminojmë çdolloj pengese dhe çdolloj bombe të kurdisur të mandatit 4+”.
Negociatat mes dy partive për formimin e qeverisë kanë ngecur së fundmi, pas më shumë se tre muajve bisedime. Në ofertën e fundit publike, LDK-ja i kërkoi VV-së të heqë dorë nga kryeparlamentari në vitin e parë të bashkëqeverisjes. Pas një viti, kur LDK-ja të marrë postin e presidentit, kjo parti ka thënë se do ta kthente pozitën e kryeparlamentarit te VV-ja. Megjithatë, për VV-në kjo ishte e papranueshme duke thënë se nuk mund ta heqë nga kjo pozitë Glauk Konjufcën e zgjedhur më 26 dhjetor edhe me votat e deputetëve të LDK-së.
