Haradinaj vlerëson përkushtimin e Arifit, thotë se do jenë bashkë edhe në detyrën e tij të re

Kryeministri i Kosovës, Ramush Haradinaj, ka vlerësuar angazhimin e këshilltarit të tij politik, Avni Arifi, i cili është emëruar ambasador në Emiratet e Bashkuara Arabe.

Haradinaj në një postim në rrjetin social Facebook, ka thënë se Arifi gjatë këtyre viteve ka treguar profesionalizëm dhe përkushtim në fuqizimin e institucioneve të vendit, transmeton Koha.net.

“Bashkëpunimi i afërt me Avni Arifin, këshilltarin e parë që në fillimet e mia si politikan dhe aktualisht Shefin e Stafit në Zyrën time politike, ka qenë një përvojë e jashtëzakonshme. Gjatë tërë këtyre viteve e vlerësoj mbi të gjitha integritetin e tij në të gjitha aspektet dhe profesionalizmin e dëshmuar në të gjitha periudhat, për ngritjen dhe fuqizimin e institucioneve të vendit”, ka thënë ai.

Haradinaj ndër të tjera ka shkruar se do të vazhdojnë të jenë bashkë edhe në misionin e tij si ambasador i Emirateve të Bashkuara Arabe.