Haradinaj: Kosova do të dijë ta ruajë e forcojë partneritetin me SHBA-në

Kryetari i Aleancës për Ardhmërinë e Kosovës, Ramush Haradinaj, teksa ka uruar Shtetet e Bashkuara të Amerikës për 248-vjetorin e krijimit të ushtrisë, ka thënë se populli i Kosovës do të jetë përjetë mirënjohës për kontributin amerikan për Kosovën.

“Kosova do të dijë ta ruajë dhe forcojë partneritetin me NATO-n, veçmas me ShBA-të. Populli ynë do të jetë përjetë mirënjohës për kontributin e madh që ushtria dhe populli amerikan kanë dhënë dhe vazhdojnë të japin për vendin tonë”, ka shkruar ai në Facebook.

Haradinaj ka shkruar se shembulli amerikan i atdhedashurisë do të mbetet frymëzim për Kosovën.

“Në këtë ditë historike për Shtetet e Bashkuara të Amerikës dhe ushtrinë e saj, uroj përzemërsisht popullin amerikan dhe përfaqësuesit e institucioneve mbrojtëse të ShBA-së, me rastin e 248-vjetorit të krijimit të ushtrisë amerikane. Shembulli i juaj i sakrificës, trimërisë, përkushtimit dhe atdhedashurisë ishte dhe do të mbetet gjithnjë frymëzim për ne dhe Ushtrinë e Kosovës. Të drejtën për të jetuar të lirë e kemi arritur falë ndihmës në kohë të duhur të Ushtrisë Amerikane dhe NATO-s, të cilët shpëtuan popullin tonë nga tragjedia dhe spastrimi etnik”, ka shkruar ai.