Udhëheqës të institucioneve gjyqësore e prokuroriale kanë bërë thirrje që për zgjidhjen e kontesteve dhe mosmarrëveshjeve ndërmjet palëve, t’i jepet prioritet ndërmjetësimit. Qëndrimet u dhanë në Ditën Ndërkombëtare të Ndërmjetësimit.
Sipas një njoftimi nga Gjykata Supreme, kryetari i këtij institucioni, Fejzullah Rexhepi, ka thënë se “pavarësisht punës së madhe që bëhet sot në gjykata, numri i çështjeve në ardhje është në rritje të vazhdueshme, ndaj alternativat si ndërmjetësimi ndikojnë në lehtësimin e punës së gjykatave, por edhe në zgjidhjen e çështjeve brenda një afati sa më të shkurtër”.
Megjithatë, bazuar në të dhënat e fundit statistikore, ky proces sipas tij ka pësuar rënie. E ai ka thënë se shkaqet dhe arsyet duhet të jenë objekt i vlerësimit të secilit kryetar gjykate, por edhe i vetë Këshillit Gjyqësor.
Kjo gjykatë në komunikatë ka bërë thirrje te të gjithë qytetarët, profesionistët e drejtësisë dhe palët e interesuara që të shfrytëzojnë ndërmjetësimin si mundësi praktike dhe të dobishme për zgjidhjen e mosmarrëveshjeve, “duke e parë atë, jo si alternativë dytësore, por si pjesë integrale të kulturës së drejtësisë në Kosovë”.
Ndërkaq, ushtruesi i detyrës së kryeprokurorit të Shtetit, Besim Kelmendi, ka inkurajuar kryeprokurorët dhe të gjithë prokurorët që, gjatë ushtrimit të detyrës, të përdorin procedurat alternative, veçanërisht ndërmjetësimin.
Sipas Kelmendit, “kjo është e dobishme edhe për qytetarët e Republikës së Kosovës, pasi zgjidhja e rasteve përmes ndërmjetësimit iu mundëson atyre të mos evidentohen si persona të dënuar në evidencat penale”.
“Për më tepër, kjo procedurë ka efekte shumë pozitive, është efikase dhe praktike, sepse kursen kohën dhe zvogëlon koston e shpenzimeve për palët në procedurë”, ka thënë ai. “Në këtë ditë të veçantë të ndërmjetësimit, u bëj thirrje të gjithë kryeprokurorëve, prokurorëve, kryetarëve të gjykatave dhe gjyqtarëve që ta kenë parasysh dhe t’i japin përparësi procedurës së ndërmjetësimit, sepse në këtë mënyrë kontribuohet në ruajtjen e raporteve të mira ndërnjerëzore mes palëve të përfshira në procedurë”, ka thënë ai.
Ndërmjetësimi nënkupton procedurën jashtëgjyqësore për zgjidhjen e kontesteve dhe mosmarrëveshjeve ndërmjet palëve, në pajtim me kushtet e parashikuara me ligj.