-
Nga:
Donika Voca Gashi
- 8 nëntor 2020 20:23
- Shpërndaje në:
Problemet me sigurinë në Aeroportin Ndërkombëtar të Prishtinës të identifikuara ndër vite kanë përfunduar me një ndëshkim prej 10 mijë eurosh për kompaninë “Limak”, e cila e menaxhon Aeroportin.
Një inspektim i Autoritetit Civil të Kosovës ka gjetur se stafi i “LIMAK”-ut ka mungesë të trajnimit bazik për sistemin e menaxhimit të sigurisë, mungesë e trajnimeve për ndihmën e parë dhe fikjen e zjarrit.
Raporti të cilin e ka siguruar KOHA shpjegon se stafi kanë mungesa në trajnime për ndërgjegjësimin e personelit të kontraktorëve dhe përdoruesve të tjerë të Aeroportit për sigurimin dhe sigurinë.
Inspektorët e AAC-së kanë gjetur se nuk ka bashkëpunim të mjaftueshëm të stafit të “Limakut” kur bëhet fjalë për trajnimet për mallrat e rrezikshme.
Më tutje, inspektorët e Autoritetit të Aviacionit Civil kanë identifikuar mungesën e aftësive për stafin, i cili është i përfshirë më operim, mirëmbajtjen dhe menaxhimin e aerodromit.
Edhe
Punëtorët e Aeroportit reagojnë, kërkojnë suspendimin e drejtorit të Limakut
Në këtë raport komisioni për shqyrtimin e shkeljeve administrative i ka përmendur dy incidente, të cilët sipas autoritetit kanë mundur të rrezikojnë sigurinë e operimeve.
Një kalim i paautorizuar i shtegut për taksim kishte ndodhur nga një automjet në gusht të vitit 2019 dhe po ashtu një në vitin 2018 kishte ndodhur kur personeli i paautorizuar ishte parë në shtegun për taksim.
Sipas këtij komisioni, serioziteti i shkeljeve është i lartë pasi që angazhimi i vazhdueshëm i personelit në detyra operative pa kryerjen e të gjitha trajnimeve të kërkuara, ka mundur dhe në disa raste ka ndikuar në uljen e nivelit të sigurisë së shërbimeve të ofruara nga “LIMAK” e si pasojë ka ndikuar në uljen e nivelit të sigurisë së operimeve në aviacion.
Autoriteti i Aviacionit Civil përmes një përgjigje me shkrim ka thënë se kjo gjobë i është caktuar pasi operatori “Limak” ka vërtetuar se mosmbajtja e rregullt e trajnimeve ka qenë e natyrës së vazhdueshme, gjatë 4 vjetëve të fundit.
“Gjoba administrative i është shqiptuar operatorit LKIA për arsye të gjetjeve të konstatuara nga inspektorët e AAC-së gjatë auditimeve/inspektimeve në periudhën kohore prej vitit 2017 deri më 2020. Këto gjetje kanë të bëjnë me mungesën e trajnimeve të personelit në LKIA sipas programit të aprovuar të trajnimeve të LKIA-së dhe angazhimin e këtij personeli në detyra operative me ndikim në siguri. Operatori veç ka marrë masa për të adresuar dhe korrigjuar gjetjet e ngritura, por kjo ka qenë larg respektimit rigoroz të programeve të aprovuara të trajnimeve, nuk ka ulur nivelin e ashpërsisë së shkeljeve dhe për këtë arsye Komisioni ka vendosur për shqiptimin e gjobës administrative”, thuhet në përgjigjen e Autoritetit të Aviacionit Civil.
Ndërsa, Aeroporti Ndërkombëtar i Prishtinës përmes një përgjigje me shkrim shkurtimisht ka thënë se nuk ka arritur t’i mbajë disa trajnime për shkak të rrethanave të krijuar nga pandemia.
Edhe
Largohen nga puna 20 punëtorë të Aeroportit të Prishtinës
“Aeroporti i Prishtinës ka humbur disa trajnime për shkak të çështjeve të trajnerëve te shkaktuara nga pandemia. Gjoba është përafërsisht 10.000€ bazuar ne rregulloren e Autoritetit të Aviacionit Civil të Kosovës", thuhet në përgjigjen e Aeroportit.
Derisa nuk ka dhënë përgjigje nëse ka rrezikuar sigurinë e operimeve me këto gjetje të inspektorëve të Autoritetit të Aviacionit Civil.
