Gjermania bën thirrje të respektohet aktgjykimi i Speciales: UÇK-ja nuk ishte në gjyq

Ambasadori i Gjermanisë në Kosovë, Reiner Rudolph, ka bërë thirrje të respektohet aktgjykimi i Dhomave të Specializuara ndaj ish-krerëve të Ushtrisë Çlirimtare të Kosovës.

Specialja të mërkurën dënoi me nga 25 vjet burgim Hashim Thaçin e Jakup Krasniqin për krime lufte, me 18 vjet burgim Kadri Veselin e 13 vjet Rexhep Selimin. 

Ambasadori gjerman ka thënë se kryetari i trupit gjykues e ka bërë të qartë gjatë shpalljes së aktgjykimit se UÇK-ja nuk ishte në gjyq dhe as qëllimi i saj për një Kosovë të pavarur. 

“Gjermania e ka mbështetur punën e Dhomave të Specializuara që nga fillimi, me bindjen se ato përbëjnë një kontribut të rëndësishëm në përballjen me krimet e luftës dhe krimet kundër njerëzimit, në forcimin e sundimit të ligjit dhe në përafrimin e mëtejshëm të Kosovës me Bashkimin Evropian. Me themelimin e Dhomave të Specializuara dhe bashkëpunimin me Tribunalin Penal Ndërkombëtar për ish-Jugosllavinë (ICTY), Kosova ka dëshmuar se po përmbush përgjegjësinë e saj, përfshirë përballjen me krimet e luftës, si një shtet i pavarur dhe sovran”, ka shkruar Rudolph. 

Ambasadori gjerman ka thënë se aktgjykimi nuk i shfajëson akerët jugosllavë nga përgjegjësia për konfliktin e armatosur dhe shkeljet në shkallë të gjerë të të drejtave të njeriut të shkaktuar ndaj popullit të Kosovës në fund të viteve ’90. 

“Aktgjykimi në asnjë mënyrë nuk i shfajëson aktorët jugosllavë nga përgjegjësia për konfliktin e armatosur dhe shkeljet në shkallë të gjerë të të drejtave të njeriut të shkaktuara ndaj popullit të Kosovës në fund të viteve 1990, të cilat tashmë janë hetuar nga gjykatat ndërkombëtare dhe që nxitën ndërhyrjen e komunitetit ndërkombëtar. U bëjmë thirrje të gjitha palëve që ta respektojnë aktgjykimin dhe dinjitetin e viktimave”, tha Rudolph.