50 autoblinda nga SHBA-ja, Ambasada: Po forcojmë kapacitetin mbrojtës të FSK-së

50 autoblinda ka pranuar Forca e Sigurisë së Kosovës nga Shtetet e Bashkuara të Amerikës. 

Ambasada e SHBA-së në Kosovë ka thënë se FSK-ja do t’i përdorë në kapacitet të plotë operacional këta autoblinda. 

“Kosova, duke përdorur burimet e saj mbrojtëse, do t’i fusë këto autoblinda në kapacitet të plotë operacional, duke shënuar një hap tjetër në angazhimin tonë të përbashkët për forcimin e kapacitetit mbrojtës të Forcës së Sigurisë së Kosovës dhe forcimin e sigurisë së dy vendeve tona”, ka shkruar Ambasada amerikane në Kosovë. 

Kryeministri në detyrë, Albin Kurti, të premten derisa ka shpërndarë fotografi nga ceremonia e pranim-dorëzimit, ka thënë se ky është hap i rëndësishëm në fuqizimin e kapaciteteve mbrojtëse të Kosovës. 

“Ushtria jonë do të vazhdojë të zhvillohet krahë për krahë me partnerin tonë strategjik, si në aspektin e trajnimeve, ashtu edhe në atë të shkollimit dhe doktrinës e cila është e bazuar në atë të ushtrisë së SHBA-së”, ka thënë ai.