Ministrja e Tregtisë dhe Industrisë, Hykmete Bajrami, u takua me zv. Ambasadorin e Italisë në Kosovë, Matteo Corradini. Temë qendrore e diskutimit ishte vazhdimi i angazhimeve të përbashkëta për fuqizimin e marrëdhënieve ekonomike në mes Kosovës dhe Italisë.
Bajrami e njoftoi Corradinin lidhur me ecurinë e reformave ekonomike si dhe rreth përpjekjeve për përmirësimin e mjedisit afarist në vendin tonë. Ajo e falënderoi ambasadën italiane e cila tha se po shërben si një urë e fuqishme lidhëse në funksion të thellimit të raporteve ekonomike në mes të dy vendeve.
Ministrja falënderoi palën italiane për bashkëpunimin lidhur me organizimin e Forumit Ekonomik ndërmjet Kosovës dhe Italisë, mbajtur në Romë në janar të këtij viti, organizuar nga ICE – Agjencia Italiane e Tregtisë dhe Ministria e Tregtisë dhe Industrisë, përkatësisht, Agjencia për Investime dhe Përkrahjen e Ndërmarrjeve në Kosovë.
Zëvendës-ambasadori Corradini tha se pala italiane është ndarë mjaft e kënaqur me rezultatet e organizimit të forumit ekonomik dhe se tashmë po punojnë së bashku me Qeverinë e Kosovës që t’i mbështesin kompanitë e interesuara italiane që të vijnë në Kosovë për të kaluar në veprime konkrete sa i përket investimeve dhe bashkëpunimit afarist me Kosovën.
