Ferizaj mbushet sërish me mbeturina

Punëtorët e kompanisë për menaxhimin e mbeturinave “Pastërtia” në Ferizaj nuk po i mbledhin mbeturinat nëpër rrugët e qytetit. Ata po e bojkotojnë punën duke kërkuar rritje të pagës e shkarkim të kryeshefit të kompanisë

Qyteti i Ferizajt është mbushur me mbeturina shkaku që punëtorët e KRM “Pastërtia” tash e pesë ditë janë duke e bojkotuar punën.

Ata po kërkojnë rritje të pagës e shkarkimin e kryeshefit ekzekutiv Basri Syla.

Qytetarët janë ankuar për kundërmim e kërkojnë nga institucionet të gjejnë një zgjidhje për pastrimin e mbeturinave.

“Një përgjegjësi duhet me jep komuna, kjo është rëndim i madh edhe për masën, edhe për shëndetin dhe për të gjithë”, ka thënë Gafurr Qalaj, qytetar.

“Ata ndoshta e kërkojnë një pagë ose një të ardhme më të mirë, sepse është e drejta e tyre. Kanë nevojë, sepse nuk kanë dorëza e as rroba, andaj kërkojnë me iu plotësua kushtet edhe atyre, por edhe me pagë, sepse paga prej 300 apo 350 eurosh dhe të punojnë deri në 3 të natës është pak e rëndë”, ka shtuar qytetari tjetër Ekrem Karaliti.

Edhe Arbëri 30 tet 2023 Punëtorët e “Pastërtisë” vazhdojnë grevën, futen me forcë në sallën e Kuvendit Komunal

Edhe opozita në këtë qytet ka kritikuar pushtetin për moszgjidhje të kësaj çështjeje.

Në fakt, çështja e punonjësve të KRM “Pastërtia” është duke u përsëritur tash e disa herë. Edhe herë të tjera janë futur në grevë me kërkesa të njëjta, e për pasojë qyteti është mbuluar nga mbeturinat.

“Duke qenë se ky është një problem i njohur dhe është ngritur disa herë në konferencat e mëpasshme , mospërmirësimi i kësaj situate është mjaft shqetësuese. Në këtë kontest si qytetarë dhe kontribuues të këtij qyteti jemi shqetësuar për ndikimin e kësaj situate në cilësinë e jetës sonë të përditshme. Mungesa e mbledhjes së rregullt të mbeturinave ka krijuar një ambient jo vetëm të pashëndetshëm, por edhe të rrezikshëm për shëndetin dhe mjedisin tonë”, ka thënë asamblistja nga radhët e LDK-së, Verona Isaku.

“Si pasojë e politizimit të kësaj kompanie dhe për keqmenaxhimin e saj kërkojmë shkarkimin e kryeshefit ekzekutiv të kësaj kompanie”, ka shtuar Besim Haziri, asamblist, po ashtu, nga LDK-ja.

Nënkryetari i Komunës së Ferizajt, Lulzim Aliu, ka thënë se Ligji për grevat e tregon qartë se punëtorët e tillë nuk kanë të drejtë të mbajnë grevë më shumë se një orë brenda ditës.

Edhe Arbëri 24 tet 2023 Punëtorët e “Pastërtisë” kërkojnë paga më të larta, vështirësohet gjendja me mbeturina në Ferizaj

“Hapi që do të ndërmarrim ne është hap ligjor që t’i mbledhim mbeturinat në qytet, sepse e kemi obligim ligjor, ndërkohë që do të marrim masa ndaj KRM ‘Pastërtia’ në lidhje me kontratat për të cilat ajo nuk po i realizon. Hapat që do të marrim është lidhja e marrëveshjeve me kompanitë e tjera qoftë publike apo private dhe prishja e kontratës apo marrja e licencës e të drejtës për operim të KRM ‘Pastërtia’”, ka thënë Aliu.

E drejtori i KRM “Pastërtia”, Basri Syla, nuk u është përgjigjur pyetjeve të KOHES lidhur me këtë çështje.