Safet Syla e Remzi Shala janë të ftuarit e radhës për t’u marrë në pyetje nga Prokuroria e Specializuar, raporton KTV.
Përderisa Syla, ish-pjesëtar i UÇK-së e TMK-së, ka bërë të ditur se do të bashkëpunojë me organet e drejtësisë, Shala ka treguar se do të refuzojë ta bëjë një gjë të tillë. Shala, që është duke u gjykuar në Kosovë për krime lufte, sipas avokatit të tij, nuk e sheh të arsyeshme të shkojë në Hagë dhe pretendon se nuk i ka bërë keq askujt.
Remzi Shala, ish-pjesëtar i njësitit special të Shtabit të Përgjithshëm të UÇK-së, është kosovari i radhës që është ftuar për t’u paraqitur më 17 janar para Prokurorisë së Specializuar.
Por, Shala ka bërë të ditur se nuk do të paraqitet vullnetarisht, nën arsyetimin se nuk e njeh këtë institucion, derisa ka bërë thirrje që edhe bashkëluftëtarët e tij të mos u përgjigjen thirrjeve.
Avokati Natal Bullakaj është duke e mbrojtur Shalën në gjykimin që po zhvillohet në Gjykatën Themelore të Prizrenit, ku akuzohet për krime lufte.
Shala, sipas Bullakajt, është ftuar në cilësinë e të dyshuarit, derisa ka treguar për arsyet e refuzimit të bashkëpunimit.
Zyra e Prokurorit të Specializuar, në një përgjigje dhënë Kohës Ditore, ka theksuar se bashkëpunimi me këtë institucion është obligim ligjor.
“Të gjitha subjektet dhe personat në Kosovë, përfshirë këtu autoritetet e Kosovës, janë të detyruar, sipas Ligjit për Dhomat e Specializuara dhe Zyrës së Prokurorit të Specializuar (ZPS), të bashkëpunojnë me ZPS dhe ta respektojnë pa vonesë cilëndo kërkesë për asistencë ose cilindo urdhër të dhënë nga ZPS”
Edhe
I kërkuari nga Specialja nuk paraqitet në seancën gjyqësore në Prizren
Përveç Shalës, gjatë ditës është bërë e ditur se një ftesë për t’u paraqitur para Prokurorit të Specializuar e ka pranuar edhe Safet Syla, i cili, mes tjerash, ka qenë edhe kolonel i UÇK-së në Zonën e Pashtrikut.
Medieve, Syla u ka thënë se do të merret në pyetje gjatë së mërkurës.
Syla, tash e disa vite, është në pozitën e Drejtorit të Zyrës për Çështje të Trashëgimisë së TMK-së, pjesë e Ministrisë së Punës dhe Mirëqenies Sociale.
Me Sylën e Shalën, numri i personave që janë intervistuar ose ftuar nga Prokuroria e Specializuar ka shkuar në së paku 6, përfshirë Sami Lushtakun, Rrustem Mustafën e Sokol Dobrunën.
