Djegia e gomave jashtë kontrollit, megjithëse është e rregulluar me udhëzim administrativ

Djegia e gomave vazhdon të jetë dukuri në Kosovë. Vetëm gjatë vitit të shkuar janë regjistruar 40 raste, sipas Agjencisë për Menaxhimin e Emergjencave. Menaxhimi i gomave të përdorura rregullohet përmes një udhëzimi administrativ të Ministrisë së Mjedisit, mirëpo ky dikaster nuk ka të dhëna për numrin e qendrave që merren me trajtimin dhe riciklimin e tyre. Njohës të çështjeve të ambientit numërojnë rreziqe të shumta nga kjo dukuri

Afro 40 raste të zjarrvënies nga djegia e gomave të nxjerra nga funksioni janë regjistruar gjatë vitit që shkoi.

Këto të dhëna figurojnë në Agjencinë e Menaxhimit të Emergjencave, sipas së cilës në katër muajt e parë të këtij viti janë evidentuar edhe 6 raste të tjera.

“Gjatë këtij viti, pra 2025, deri në javën e tretë të muajit prill, janë regjistruar 6 raste të zjarreve që kanë ardhur si pasojë e djegies së gomave të automjeteve në ambiente të hapura”, thuhet nga Agjencia.

E menaxhimi i këtyre gomave është i rregulluar përmes një udhëzimi administrativ të Ministrisë së Mjedisit, qëllimi i të cilit është parandalimi i ndotjes së mjedisit nga ky material.

Në dokument thuhet se ekzistojnë qendra grumbulluese, shërbyese e trajtuese që merren me riciklimin e gomave të nxjerra nga përdorimi.

Edhe Arbëri 23 mar 2025 Dëmet nga zjarret, të mëdha – Policia nis hetimet për mbi 40 raste

Por në Ministri thanë se nuk kanë informacione për numrin e tyre në Kosovë.

“Përderisa është në fuqi Udhëzimi Administrativ, palët (prodhuesit, importuesit dhe konsumatorët apo pronarët e gomave) kanë detyrime dhe përgjegjësi që ta zbatojnë atë. Sa i përket Licencës për menaxhim të mbeturinave janë katër kompani që janë të licencuara, po meqenëse licenca për menaxhim të tyre tani më është shfuqizuar, prej shtatorit të 2022-s ajo është inkorporuar në leje mjedisore”, thuhet nga Ministria e Mjedisit.

Ekspozimi dhe djegia e gomave janë tejet të dëmshme për shëndetin e njerëzve dhe ambientin, vlerësojnë ambientalistët.

 “Kemi edhe komponime kancerogjene, të cilat në bashkëpunim me karbonin e zi që del edhe me dyoksidin e karbonit krijojnë efekte negative në shëndetin tonë, e parimisht në rrugët e frymëmarrjes, sidomos edhe në zvogëlimin apo dobësimin e kapacitetit tonë të mushkërive për të pasur dhe absorbuar ajër më të pastër”, ka deklaruar Egzona Shala, njohëse e çështjeve të ambientit.

Shala tha se Ligji për Mbeturinat përcakton qartë që hedhja e tyre duhet të bëhet nëpër vendet e caktuara. Sipas saj, edhe Ligji për Ajrin e ndalon rreptësisht djegien e gomave në natyrë.

“Thuhet specifikisht që gomat duhet të dorëzohen në vend të caktuar nga furrnitori apo përdoruesi i fundit në këtë situatë. Fatkeqësisht ende nuk e kemi këtë vend të caktuar në nivel kombëtar edhe pse ka disa iniciativa të vogla nga kompanitë”, ka shtuar ajo.

Edhe Arbëri 7 sht 2026 Mbi gjysmë milion tiketa në tetë muaj për shoferët e papërgjegjshëm

KOHA ka kontaktuar disa kompani që janë marrë paraprakisht me ripërpunimin e gomave të dala nga përdorimi, por në përgjigjet e tyre thuhet se kanë ndaluar veprimtaritë.

E në Ministrinë e Ambientit thanë se janë duke e hartuar një ligj i ri për mbeturinat, në të cilin do të përfshihet edhe trajtimi i gomave.