Në kuadër të fillimit të muajit rozë, është organizuar fushata vetëdijesuese “Race for the Cure 2023”, me qëllim të ndërgjegjësimit të qytetarëve kundër sëmundjes së kancerit të gjirit. Ndërkaq, u bë thirrje për kryerjen e mamografisë, në mënyrë që të parandalohet dhe zbulohet më herët sëmundja e kancerit të gjirit. Komuna e Prishtinës u mundëson të gjithë qytetarëve të Kosovës që të bëjnë mamografinë falas.
Ky organizim filloi me defilimin e motoçiklistëve MC Eagles dhe çiklisteve të Kosovës nga Sheshi “Ibrahim Rugova”, si shenjë mbështetjeje ndaj grave të prekura nga sëmundja e kancerit të gjirit. Ndërsa vazhdoi me performancën e një grupi të baletit nga studio e baletit “Pirueta”.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoKrejt në fund, filloi edhe vrapimi nga sheshi “Ibrahim Rugova”, deri te “Rrethi me Flamur”, ndërsa ecjen e vazhduan deri te katedralja.
Kryetari i Prishtinës, Përparim Rama tha se kanceri i gjirit është një sëmundje që ndan familjet, duke mos i kursyer as meshkujt, derisa u bëri thirrje të gjithë qytetarëve të Kosovës që të bëjnë mamografinë në mënyrë që sëmundja të zbulohet më herët.
"Jemi bërë së bashku këtu kundër betejës së kancerit të gjirit, një sëmundje e keqe, një sëmundje që ndanë familje, një sëmundje që na i ka marrë nënat, motrat, gratë. Një sëmundje po ashtu, jo vetëm që i sulmon gratë në gji por edhe meshkujt, nuk është vetëm aspekti gjinor, nuk janë vetëm gratë në pyetje por janë edhe meshkujt...Së bashku me doktorin tash i kemi tre mamografë, kemi mundësi të shumta për secilin qytetarë, për gra dhe meshkuj që të shkojnë të shohin se a kanë probleme. Ne si kryeqytet po i hapim këto mundësi, edhe për të gjitha komunat e Kosovës", tha Rama.
I pari i kryeqytetit, Përparim Rama shtoi se nuk do të ndalen derisa numri i vdekjeve nga kanceri i gjirit të bie në zero.
Ndërsa, drejtori i Klinikes së Onkologjisë në Qendrën Klinike Universitare të Kosovës (QKUK), Ilir Kurtishi tha se numri i grave të prekura me sëmundje të gjirit, po shënon rritje në Kosovë, derisa potencoi se deri në fund të këtij viti, numri mund të arrijë deri në 450.
"Fakti që ne sot në Kosovë i identifikojmë gratë me kancer të gjirit në stadin e parë dhe të dytë, është një ngritje, derisa para dy-tri vjetëve te shumica e femrave, të cilat i kemi trajtuar në Klinikën e Onkologjisë, kanë qenë në stadin e tretë-katër të sëmundjes, pra mbi 60 deri 70 për qind, kurse dy vjetet e fundit, ky numër ka shënuar rënie në kuptimin e identifikimit në stadin e tretë apo të katërt...Numri i grave me kancer të gjirit është nga dita në ditë në rritje. Në Kosovë në këtë vit ne kemi rekord të këtyre numrave, dhe për herë të parë kemi identifikuar mbi 450 gra me kancer të gjirit, dhe është diku 10-15 për qind më shumë se vitin e kaluar. Akoma më shqetësuese është që ne vazhdojmë të gjejmë gra të reja ndër moshën 50-vjeçare, gra të cilat e kanë sëmundjen në stad shumë të avancuar", potencoi Kurtishi.
Ndërsa, udhëheqësja e organizatës joqeveritare “Renesansa”, Violeta Pirana tha se duhet të luftojmë kundër kësaj sëmundje gjatë gjithë vitit, dhe jo vetëm në muajin tetor.
“Mos të ndalemi vetëm në tetor por duhet të luftojmë edhe 11 muajt të tjerë sepse numri i pacientëve të kancerit të gjirit është në rritje e sipër dhe duhet të them se nuk duhet ta lëmë që koha të na merr sepse kemi mamografi, kemi mjekë, kemi Onkologji, në mënyrë që këto sëmundje t’i pakësojmë“, tha Pireva.
Të pranishmit i përshëndeti edhe drejtori i Shëndetësisë në Komunën e Prishtinës, Izet Sadiku, i cili tha se kjo fushatë ka treguar se sa e rëndësishme është që të gjithë të bëhen bashkë kundër kësaj sëmundjeje.
Ai shtoi se heroinat e kësaj fushate mbeten shumë gra që kanë kaluar këtë sëmundje duke i motivuar ata që të jenë më të fortë.
Sadiku potencoi se vetëm në shtator të këtij viti janë realizuar rreth 300 mamografi, derisa tregoi se gjatë këtij muaji do të ketë shërbime falas edhe për gratë e komunave të tjera.
“Race for the Cure” është fushatë që organizohet në 140 vende të ndryshme të botës, që ka për qëllim ndërgjegjësimin ndaj kësaj sëmundje të rëndë.
Përndryshe, fillimi i muajit tetorit nënkupton fillimin e muajit të ndërgjegjësimit të kancerit të gjirit. Muaji i vetëdijesimit të kancerit të gjirit, ndihmon në rritjen e vëmendjes dhe mbështetjes për vetëdijen, zbulimin dhe trajtimin e hershëm, si dhe kujdesin për këtë sëmundje./ksp