Basha për aksidentin me fatalitet në autostradë: Raporti policor thotë se drejtuesi humbi kontrollin mbi veturën

Ministri në detyrë i Infrastrukturës, Dimal Basha, ka reaguar lidhur me vetaksidentin tragjik të 14 qershorit në autostradën "Ibrahim Rugova", ku humbi jetën një pasagjere. Përmes një statusi, Basha ka thënë se raporti zyrtar i Policisë së Kosovës ka konstatuar se gjendja e rrugës nuk ka qenë shkaktare e aksidentit, por se drejtuesi i veturës ka humbur kontrollin. 

Basha i ka quajtur akuzat e mëparshme të disa politikanëve si "propagandë politike".

"Sot, Raporti zyrtar i Policisë së Kosovës tregon që në bazë të hetimeve profesionale, drejtuesi i automjetit e ka humbur kontrollin mbi veturën, duke goditur fillimisht sinjalizimin rrugor dhe më pas elementet mbrojtëse anësore. Për dallim nga raportimet e pavërteta dhe akuzat e nxituara të disa politikanëve e mediave, Raporti konstaton se të dy shiritat e qarkullimit kanë qenë të lirë për lëvizje dhe se gjendja e rrugës nuk ka ndikuar në shkaktimin e aksidentit", ka shkruar Basha.

Ky reagim i Bashës vjen pas një jave me përplasje verbale mes zyrtarëve të pushtetit qendror dhe kreut të Prishtinës. Fillimisht, kryetari i kryeqytetit, Përparim Rama, kishte kritikuar ashpër Qeverinë në detyrë duke pretenduar se problemet me rrëshqitjen e dheut në autostradë ishin zvarritur për vite me radhë dhe se qytetarët po e paguanin çmimin "me jetë dhe me taksa", sidomos pas ndarjes së 4.67 milionë eurove për largimin e dheut.

Ndaj deklaratave të Ramës patën reaguar menjëherë eksponentë të Lëvizjes Vetëvendosje. Deputeti i zgjedhur i VV-së Ilir Kërçeli i kishte bërë thirrje Ramës që para se të merrej me "makropolitika", ta pastronte Prishtinën nga mbeturinat dhe minjtë.

Kishte reaguar edhe koordinatorja e komiteteve në LVV, Dejona Mihali, e cila e akuzoi Ramën se kishte përdorur një tragjedi njerëzore, duke ironizuar njëkohësisht me kontratat dhe shërbimet emergjente në komunë.