Banorët e Pejës kërkojnë dezinfektimin e rrugëve të qytetit

Pavarësisht premtimeve, rrugët e Pejës kanë mbetur pa u dezinfektuar.

Për herë të fundit ato janë dezinfektuar para tri jave.

Ky fakt ka shkaktuar reagime edhe te qytetarët, në veçanti tek grupmoshat që konsiderohen më të rrezikuara nga infektimi me Covid-19.

Ditë më parë rrugët janë fshirë nga punëtorët e kompanisë “Ambienti”, por qytetarët kërkojnë edhe dezinfektimin e tyre

Si të nevojshëm në periudhë pandemie, dezinfektimin e rrugëve e sheh edhe shefi i repartit të Infektives në Spitalin Rajonal të Pejës, infektologu Zenel Shatri.

“Dezinfektimi i rrugëve në qytete e po ashtu edhe në fshatrat që janë të banuara është mirë të bëhet për arsye se virusi kryesisht mbetet poshtë në tokë, në dysheme, kështu që preferohet që të bëhet dezinfektimi i rrugëve të qytetit dhe fshatrave”, ka thënë Shatri për KOHËN në telefon.
Dezinfektimi i premtuar para dy jave, nuk kishte ndodhur nën arsyetimin e motit të paqëndrueshëm.

“...duhet të theksoj që gjatë kësaj jave, bashkë me Drejtorinë e Emergjencës kemi hartuar një strategji për të filluar edhe një raund të ri të pastrimit të qytetit në tërësi”, ka deklaruar Petrit Loci, drejtor i Shëndetësisë në Pejë.

Sipas Locit, prioritet i Komunës ka qenë dezinfektimi i objekteve në të cilat ka frekuentim të njerëzve dhe, sipas tij, janë dezinfektuar deri tash rreth 60 objekte të ndryshme.