Babai i viktimës nga Ferizaj i mllefosur me gjyqësorin, kërkon masa ndaj kryerësve

Babai i viktimës 18-vjeçare nga Ferizaj, që ditë më parë dyshohet se u vra nga personi me të cilin bashkëjetonte, është shprehur i mllefosur me organet e drejtësisë se si i dyshuari ka qenë i lirë pavarësisht se ka qenë i njohur për kryerjen e disa veprave penale.

Në televizionin publik, ai ka thënë se vonë e ka kuptuar se e bija e tij ka qenë me një person me të kaluar kriminale. Ka thënë se pret që organet e rendit dhe ligjit ta zbardhin rastin.

“Gjyqësori do të duhej të merrte masa ndaj këtij personi i cili familjen time e goditi keq. Jemi shumë të shqetësuar për këtë që më ka ndodhë”, ka thënë ai.

I dyshuari kryesor për këtë vepër është në arrati. Policia ka kapur një tjetër person që bashkë me të dyshuarin kryesor kishin dërguar trupin e pajetë në spital.

Babai i 18-vjeçares, M.O. lutet që ky rast të jetë i fundit.

Sipas tij, e bija ka jetuar afro dy muaj me të dyshuarin Dardan Krivaqa, “por vajza e tij ka qenë në presion dhe është frikësuar t’i tregojë familjes për dhunën që i ka ushtruar personi”.

Edhe Kronikë 25 gus 2021 Prokuroria kërkon paraburgim për Dardan Krivaqën

Ai shton se vazhdimisht e kanë pyetur, por 18-vjeçarja nuk ka treguar asgjë, sepse ka qenë në presion psikik.