-
Nga:
Agim Ademi
- 30 shtator 2022 00:53
- Shpërndaje në:
Agjencia e Ushqimit dhe Veterinës ka nisur një aktivitet për asgjësimin e kafshëve me sëmundje të brucelozës në rajonin e Ferizajt.
Ky institucion është njoftuar nga një pronar i një ferme për dyshimet se disa krerë lopë janë të sëmura dhe pas analizave laboratorike ka nisur asgjësimi i tyre.
Drejtori i AUV-it për rajonin e Ferizajt, Selami Salihu, ka thënë se sëmundja e brucelozës bartet lehtë edhe tek njerëzit, andaj fermerët duhet të kenë kujdes dhe t’i lajmërojnë rastet e tilla.
“Tani këtu kemi dalë për ta bërë asgjësimin e tre krerëve të lopëve për shkak se kanë rezultuar pozitive në sëmundjen e brucelozës, sëmundje kjo infektive me karakter që transmetohet nga kafshët tek njeriu. Kjo sëmundje ka ardhur pas njoftimit të veterinarit se në njërën nga fermat e Komunës së Ferizajt ka pasur dyshime për sëmundjen e caktuar. Në momentin e njoftimit kemi dalë në fermë, kemi bërë kontrollimet dhe kemi marrë mostrat e gjakut dhe i kemi dërguar në laborator”, tha Selami Salihu, drejtor i AUV-it në Ferizaj.
Salihu tregon se deri tash shkaku i kësaj sëmundjeje në këtë rajon janë asgjësuar edhe 42 krerë delesh.
“Deri më tani nuk kemi raste të tjera, sepse zakonisht rasti i informimit tek AUV-i vjen përmes zinxhirit fermer-veterinar-agjenci, derisa veterinarët tek fermat e kafshëve në ferma fermerët i njoftojnë për dyshimet mbi sëmundjet për shkak të aborteve kryesisht, sepse janë abortet ato që i bëjnë të dyshojnë veterinarët”, pohoi ai.
Edhe
23 kafshë të infektuara me brucelozë në Skenderaj, prej 20 ditësh në pritje të asgjësimit
“Pas groposjes këtu në vend të ngjarjes ne do të marrim të gjitha masat e nevojshme duke shkuar në fermë për të bërë largimin e të gjithë mbetjeve ku kanë qëndruar kafshët e prekura me brucelozë, do të bëjmë dezinfektimin e hapësirës dhe do ta urdhërojmë fermerin që mos të fusë kafshë të tjera deri në një kohë të caktuar”, shtoi Elham Luzha, inspektor i veterinës në AUV.
Fermeri të cilit iu asgjësuan krerët e lopëve nuk ka dashur të flasë para kamerës, por ka kërkuar nga institucionet përkatëse t’i bëhet kompensimi i tyre.
