Autoriteti i Konkurrencës nis monitorimin e çmimit të naftës

Autoriteti i Konkurrencës i Kosovës të enjten ka njoftuar se ka nisur monitorimin e tregut të karburanteve në vend, duke përfshirë tregtimin me shumicë dhe me pakicë, me fokus të veçantë te çmimet e naftës dhe benzinës në pikat e shitjes.

Sipas njoftimit, të gjitha ndërmarrjet që ushtrojnë veprimtari në tregtimin e karburanteve në Kosovë janë aktualisht nën monitorim.

Autoriteti thekson se përmes këtij procesi synon të sigurojë mbrojtje nga marrëveshjet e ndaluara, abuzimi me pozitën dominuese dhe praktikat e bashkërenduara ndërmjet kompanive që operojnë në këtë treg.

“Çdo marrëveshje, bashkërendim apo veprim i njëanshëm ndërmjet bizneseve që ka për qëllim ose efekt rritjen artificiale të çmimeve, ndarjen e tregut apo kufizimin e konkurrencës përbën shkelje të rëndë të ligjit dhe është subjekt i sanksioneve ligjore”, thuhet në njoftim.

Sipas Autoritetit, çmimet e karburanteve në tregjet ndërkombëtare përditësohen vazhdimisht, duke reflektuar faktorë të ndryshëm si oferta dhe kërkesa, kostot e përpunimit dhe zhvillimet ekonomike e gjeopolitike. Për këtë arsye, pritet që edhe luhatjet e çmimeve në tregun vendor të pasqyrojnë ndryshimet në tregjet ndërkombëtare.

Institucioni u ka bërë thirrje bizneseve që të veprojnë në përputhje me parimet e konkurrencës së lirë dhe të ndershme, të shmangin çdo formë të bashkërendimit të çmimeve me operatorë të tjerë dhe të tregojnë përgjegjësi sociale ndaj qytetarëve dhe konsumatorëve.

Edhe Arbëri 11 mar 2026 Autoriteti i Konkurrencës s’ka vërejtje për abuzim me çmimet e karburanteve

Autoriteti i Konkurrencës ka bërë të ditur gjithashtu se procesi i monitorimit po zhvillohet në koordinim me Ministrinë e Industrisë, Ndërmarrësisë dhe Tregtisë, Administratën Tatimore e Kosovës dhe Doganën e Kosovës, me qëllim të sigurimit të respektimit të legjislacionit në fuqi dhe të rregullave të tregut në vend.

Gjatë ditës së djeshme, KOHA ka raportuar se brenda 48 orësh çmimi i një litre nafte është rritur për më shumë se 20 centë në Kosovë, pavarësisht se çmimi i importit të kësaj lënde, sipas Doganës, ka pësuar rritje prej vetëm 1.5 cent për litër.