Kryetari i Lidhjes Demokratike të Kosovës, Lumir Abdixhiku, ka prezantuar Janina Ymerin si kandidate për deputete për zgjedhjet e 28 dhjetorit.
Abdixhiku e përshkroi Ymerin si një aktiviste të guximshme politike, e cila ngriti zërin kundër mafias energjetike dhe zbuloi mënyrën se si miliona euro të qytetarëve të Kosovës përfunduan në llogaritë e Vuk Hamoviqit, të birit të ish-shefit të Armatës Jugosllave, Rade Hamoviq. Sipas Abdixhikut, Ymeri e shpërfaqi më së miri mashtrimin populist që ndodh sot.
“Vukvendosje - siç i dha epitet me të drejtë ajo, shërfaqë më së miri mashtrimin popullist që ndodhë sot. Njërën dorë të shtrirë tek mafia energjetike dhe milionat e popullit të Kosovës që shkojnë aty - tjetrën me gisht ndaj patriotëve të vendit për tradhti. Trushpëlarja kështu duket. Janina, e vetme, kërkoi llogari, artikuloi me fakte dhe nuk u tremb nga pushteti. Ajo përfaqëson aktivisten politike të kohës sonë: atë që nuk e blen propaganda dhe nuk e hesht padrejtësia”, ka shkruar ai.
Abdixhiku tutje u shpreh se Janina Ymeri e përfaqëson më së miri aktivisten politike të kohës sonë.
“...atë që nuk e tremb pushteti; atë që nuk e blen propaganda; atë që nuk e hesht padrejtësia. Ajo vjen në politikë nga beteja e së vërtetës. Nga përballja me korrupsionin.Nga përkushtimi i sinqertë për interesin publik”, ka shkruar kryetari i LDK-së.
Sipas tij, LDK është shtëpia e njerëzve të drejtë, profesionalë dhe të guximshëm, që nuk e përdorin politikën për interesa personale, por për vendin.
Gjatë ditëve të fundit, LDK-ja ka prezantuar aderime si inxhinierin Ermal Sadiku, gazetarin Festim Kabashi e këngëtarën Adelina Thaçi.