Abdixhiku për “Rrugën e re” të LDK-së: Larg pazareve e interesave të ngushta

Duke lavdëruar zgjedhjen e Pëllumb Bajqinovcit, kryekuvendar të Prishtinës, kryetari i Lidhjes Demokratike të Kosovës, ka thënë se Bajqinovci hyn në kuadrot e asaj që tashmë po quhet si “Rruga e re e LDK-së”. Kjo rrugë sipas Abdixhikut është rrugë “larg pazareve e interesave të ngushta, larg polarizimeve, larg ngecjes”.

Bajqinovci u zgjodh të premten kryekuvendar i Prishtinës në një votim ku morën pjesë vetëm LDK-ja e PDK-ja në pushtet. Vendimi për zgjedhjen e tij është në dyshim, pasi Ministria e Administrimit të Pushtetit Lokal i ka shpallur të pavlefshme vendimet e një seance më parë, kur LDK-ja e PDK-ja votuan për shkarkimin e Fehmi Kupinës nga kryekuvendari. MAPL-ja ka thënë se seanca ishte e mbyllur, para se të merrej vendimi dhe madje një ditë para seancës së jashtëzakonshme rekomandoi të mos mbahej duke thënë se fillimisht duhet shkarkuar kryetari aktual. Pra, tash për tash, Bajqinovci njihet nga autoritetet lokale si kryekuvendar, ndërsa ato qendrore e konsiderojnë Kupinën.

Duke përgëzuar zgjedhjen e Bajqinovcit, Abdixhiku iu kthye edhe një herë temës së “Rrugës së re”, apo asaj që njihet edhe si “Rruga pa Kurtin”.

“Pellumb Bajqinovci, asambleist i LDK-së, është zgjedhur sot Kryesues i ri i Kuvendit Komunal të Prishtinës. Për këtë falënderoj të 26 këshilltarët komunal që Kryeqytetit po i japin përfaqësimin e denjë. Përveç se profesionist, përafrues e me plot interes për qytetin e tij e tonin, Pëllumbi është dhe veprimtar e bashkëpunëtor i jashtëzakonshëm në familjen tonë politike. E prita sot me plot kënaqësi. Dhe pikërisht me kuadro të tilla, ‘Rruga e re’ e Lidhjes do të bëjë të ardhmen e Republikës. Larg pazareve e interesave të ngushta, larg polarizimeve, larg ngecjes”, ka shkruar Abdixhiku në Facebook.

Në kuadër të kësaj “rruge”, LDK-ja ka nisur takime me akterë të shoqërisë, gazetarë, organizata joqeveritare e anëtarë, akademikë e diplomatë. Në paralajmërimin e parë për këtë seri takimesh, kryetari i partisë, Lumir Abdixhiku, pati thënë se “Kosova ka nevojë për rrugë të re”, e sipas tij “në atë rrugë s’ka (kryeministër) Albin Kurti”.

Një ditë më parë, Visar Azemi nga kjo parti u shpreh në “Interaktiv” të KTV-së se LDK-ja do ta prezantojë një program qeverisës pas pushimeve të verës. Sipas tij, kjo rrugë është “rrugë identitare e LDK-së për ta hequr Kosovën nga dy rrugë”. Sipas tij, këto dy rrugë janë “ajo e izolimit të Kurtit” dhe “e skandaleve të autostradave e blerjes së tokave me centa dhe hajnive të ndryshme që kanë ndodhur me qeveritë e kaluara”.