Në LDK thonë se Abdixhiku s’u konsultua për emrin e Sejdiut, nesër mblidhet Kryesia e partisë

Kryetari i Lidhjes Demokratike të Kosovës, Lumir Abdixhiku, nuk e ka diskutuar me strukturat e partisë emrin e Bekim Sejdiut për president, të cilin e bëri të ditur sot vetë ai në një konferencë për media pas takimit të zhvilluar në hapësirat e Kuvendit me kreun e Lëvizjes Vetëvendosje, Albin Kurti, ka bërë të ditur për KOHËN në kushte anonimiteti një nga deputetët e LDK-së.

Një tjetër burim brenda partisë i ka thënë KOHËS se të martën në orën 14:00 do të mblidhet Kryesia e LDK-së e më pas do të ketë mbledhje edhe me Grupin Parlamentar. Rendi i ditës nuk është bërë i ditur. Por, në takim pritet që Abdixhiku ta kërkojë garancinë e deputetëve për votimin e Sejdiut për president.

Përmes një postimi në Facebook, Abdixhiku ka shprehur bindjen se LDK-ja do ta mbështesë këtë marrëveshje, pasi sipas tij, shteti është më i rëndësishëm se interesi partiak.

“LDK-ja do ta mbështesë këtë marrëveshje me bindjen se shteti është më i rëndësishëm se çdo interes partiak. Këtë e kemi besuar gjithmonë. Këtë po e dëshmojmë edhe sot. Sot, përgjigja jonë ndaj jostabilitetit, kaosit e dyshimeve, është një Republikë me President dinjitoz; e me një LDK, që qëndron në origjinë - rugoviste e institucionaliste. Ajo jep individë me integritet; edhe kur nuk merr asgjë në kthim për veten. Sepse e do shtetin më shumë se sa veten”, ka shkruar ai.

Emri i Sejdiut u prezantua të hënën pas takimit të zhvilluar nga Kurti dhe Abdixhiku në orën 12:00. 

Sejdiu ka pranuar propozimin për të kandiduar për president, duke thënë se është vënë në shërbim të Republikës së Kosovës dhe qytetarëve të saj. Ai ka theksuar se ndonëse ambicia e tij ka qenë kryesisht e orientuar drejt fushave akademike dhe profesionale, ka vendosur ta pranojë propozimin duke pasur parasysh përgjegjësinë që bart posti i presidentit dhe rrethanat aktuale politike në vend.

Edhe Arbëri 1 o. më parë VV-ja e LDK-ja pajtohen për emrin e Bekim Sejdiut për president

Të dielën në një intervistë për Kosovapress, deputeti i Lëvizjes Vetëvendosje, Adnan Rrustemi, ka thënë se i takon Abdixhikut të sigurojë zbatimin e marrëveshjes nga Grupi Parlamentar i kësaj partie.

Rrustemi ka thënë se LVV-ja nuk mund të flasë për sjelljen individuale të deputetëve të LDK-së, por përgjegjësia për menaxhimin e tyre i takon Abdixhikut.