Abdixhiku: Kosova e pasigurt, si kurrë më parë

“Republika e Kosovës udhëhiqet sot nga mosbesues të saj. Ajo është peng i populizmit, arrogancës së pushtetit dhe i kompetencës qeverisëse. Jeta e qytetarëve tanë nuk ka qenë asnjëherë më e pasigurt, siç është e pasigurt edhe e ardhmja integruese evropiane e Kosovës”, ka thënë Abdixhiku në hapje të Konventës së LDK-së

Kritika ndaj kryeministrit Albin Kurti dhe Qeverisë që ai e drejton ka adresuar të premten kryetari i Lidhjes Demokratike të Kosovës (LDK), Lumir Abdixhiku, në hapje të Konventës së punës së kësaj partie. Ai ka thënë se ka mungesë guximi për vendimmarrje nga Ekzekutivi e kjo, sipas tij, bën që e ardhmja evropiane e Kosovës dhe e qytetarëve të saj të jetë më e pasigurt se ndonjëherë më parë.

“Republika e Kosovës udhëhiqet sot nga mosbesues të saj. Ajo është peng i populizmit, arrogancës së pushtetit dhe i kompetencës qeverisëse. Jeta e qytetarëve tanë nuk ka qenë asnjëherë më e pasigurt, siç është e pasigurt edhe e ardhmja integruese evropiane e Kosovës”, ka thënë Abdixhiku.

Ai ka theksuar se qasja e Qeverisë dhe mungesa e guximit kanë bërë që t’i jepet hapësirë Serbisë në avancimin e agjendave të saj dhe minimin e atyre të Kosovës.

“Kjo qeveri populiste as nuk ka vizion e as nuk ka ide se si do ta përmbyllë procesin e dialogut në krahë me aleatët tanë ndërkombëtarë. Ajo nuk po tregon vullnetin që të udhëtojë së bashku me partnerët tanë, në njërën anë, e të mbrojë integritetin, sovranin dhe rendin kushtetues të Kosovës, në anën tjetër”, ka thënë Abdixhiku. “Ne duhet të shfrytëzojmë momentin e ri historik të unifikimit perëndimor për të mbyllur çështjet tona integruese dhe dialogun për njohje të ndërsjellë si mjet i realizimit të këtij integrimi ta përfundojmë”.

Kryetari i LDK-së ka konstatuar se Qeveria e ka braktisur dialogun.

Edhe Zgjedhjet 2025 28 dhj 2025 Abdixhiku fton Kuvendin e LDK-së, paralajmëron dorëheqje

“Me këtë braktisen edhe interesat e Kosovës sepse sot, që ta kemi të qartë, nuk ka gjë më të dëmshme sesa ‘status quo’ integruese e Kosovës, mbetja jonë në vend në kohë të tërmeteve politike e pozitive në kontinent është regres”, ka thënë ai.

Gjatë punimeve në ditën e parë të Konventës, ai ka folur edhe për të ardhmen e LDK-së. Po kështu, ka bërë të ditur se në të do të hartohet programi ideologjik e qeverisës i LDK-së.

Ndërkaq Arben Gashi, shef i Grupit parlamentar të LDK-së, ka thënë se në konventë do të ridefinohet e ardhmja e partisë.

“Ne ramë pothuajse në dakordësi me të gjithë panelistët se LDK-ja e sotme është trashëgimtare e dinjitetshme e 30 vjetëve të fundit, por duhet të ridefinojmë strukturën, duhet të ridefinojmë programin dhe duhet të përcaktojmë po ashtu idetë”, ka thënë Gashi.

Edhe Arbëri 6 maj 2025 Rexhepi e quan të turpshme e të papranueshme deklaratën e Abdixhikut, reagon Mustafa

Sipas tij, puna do të vazhdohet edhe në muajt vijues, në mënyrë që të përfundojë programi politik e qeverisës i LDK-së.

Punimet e Konventës Programore të LDK-së me moton “Lidhja për të ardhmen” do të vazhdojnë edhe të shtunën.