Aleanca për Ardhmërinë e Kosovës do të garojë si subjekt i vetëm në zgjedhjet e 28 dhjetorit. Kjo parti ka dorëzuar aplikimin për regjistrim, pa ndonjë marrëveshje koalicioni me parti të tjera, ka njoftuar Komisioni Qendror i Zgjedhjeve, pak orë para mbylljes së afatit për partitë që të aplikojnë për certifikim të pjesëmarrjes apo t’i deklarojnë koalicionet.
Si rrjedhojë, kjo nënkupton se lista e AAK-së mund të marrë emra të partive të tjera vetëm si pjesë e listës dhe jo me ndryshim emri në fletëvotim.
Si të vetme kanë garuar edhe Partia Demokratike e Kosovës e Lidhja Demokratike e Kosovës. Ndërsa Lëvizja Vetëvendosje ka hyrë në koalicion të përbashkët me Guxo, Alternativën dhe PSHDK-në.
Nisma Socialdemokrate ende nuk ka zyrtarizuar rrugën që do të ndjekë në këto zgjedhje, me ndonjë koalicion apo anëtarët e saj do të garojnë në ndonjë listë të partive të tjera.
Në zgjedhjet e shkurtit, AAK-ja e Nisma ishin në koalicion. Siguruan tetë ulëse.