-
Nga:
Marigona Brahimi
- 18 mars 2026 19:37
- Shpërndaje në:
Për kabinetin qeveritar më të madh në rajon, Aleanca për Ardhmërinë e Kosovës e ka kritikuar Lëvizjen Vetëvendosje. Në AAK thanë se rregullorja që ka miratuar Qeveria në shkurt ia ka mundësuar vetes të ketë strukturën qeveritare më të madhe dhe më të kushtueshme e me emërime të tepruara politike.
Aleanca për Ardhmërinë e Kosovës e ka kritikuar Vetëvendosjen për kabinetin më të madh qeveritar në rajon.
Në një konferencë për media, shefi i grupit parlamentar të AAK-së, Besnik Tahiri, ka thënë se sipas rregullores për përgjegjësitë administrative të miratuar në Ekzekutiv më 20 shkurt, kabineti i Qeverisë Kurti parashihet të ketë 453 persona staf politik që sipas tij reflekton emërime të tepruara politike.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoTahiri theksoi se partia në pushtet është akomoduar në Qeveri duke e bërë strukturën qeveritare më të madhen dhe më të kushtueshmen në rajon.
“Kjo qeveri i ka 453 njerëz që mundet me i emëru politikisht. Nuk po e thotë Besnik Tahiri. Po e thotë rregullorja 04/2026, e cila për mendimin tim përbën numrin më të madh, madhësinë më të madhe të emërimeve politike të kabineteve që e ka dikush”, tha ai.
Kjo rregullore, vetëm kryeministrit ia mundëson që të emërojë 15 këshilltarë politikë dhe 9 nga radhët e komuniteteve në Kosovë, 10 këshilltarë të jashtëm politikë dhe 15 nëpunës në kabinet.
“50 njerëz, 49 staf i ka në kabinetin e tij. A ju kujtohet çfarë thoshte ky? Kryeministri s’ka nevojë… për pak këshilltarë ka nevojë. 50 i ka bërë, me rregullore pra”, deklaroi ai.
Por, Tahirin e ka kritikuar deputeti i Vetëvendosjes, Artan Abrashi, i cili ia ka rikujtuar kabinetin e Qeverisë Haradinaj me rreth 80 zëvendësministra.
“E pashë konferencën e AAK-së. Kritikuan për kabinetin e madh. Veç mu kujtuan menjëherë diku 80 zv.ministra, njërit qe as emrin s’ia dinte kryeministri Haradinaj asokohe. Mos të flasim për stafin tjetër”, shkroi Abrashi.
Në konferencë u kritikua edhe numri i ulët i grave të përfaqësuara në poste ministrore.
“Kemi një kabinet më diskriminues pasi nga 21 anëtarë sot i kemi vetëm katër gra ministre. Deri dje në fushata kanë folur për të drejtat e grave e sot i kemi vetëm 4 gra ministre. Kemi më pak se 20 për qind të kabinetit qeveritar”, tha deputetja e AAK-së, Albana Bytyqi.
Qeveria aktuale ka 19 ministri, katër më shumë se që ka pasur në dy mandatet e mëhershme.