SHSKUK-ja kërkon raport nga dy klinika lidhur me raportimet e KOHËS

Shërbimi Spitalor dhe Klinik Universitar i Kosovës ka reaguar lidhur me dy artikuj të publikuar nga KOHA, lidhur me kryerjen e operacionit në Klinikën e Urologjisë, pa anestezion, e po ashtu, mosoperimin e pacientit tjetër dhe dyshimin se i njëjti është kryer në klinikë private.

Përmes një postimi në ">Facebook, bëhet e ditur se menaxhmenti i SHSKUK-së, ka kërkuar raport me shkrim nga dy klinikat përkatëse dhe janë në pritjet të këtyre raporteve, për të proceduar tutje me rastet.

“Po ashtu, SHSKUK fton të gjithë qytetarët që ka ankesa, apo vështirësi gjatë trajtimit shëndetësorë, në institucionet e SHSKUK-së, t'i drejtohen me shkrim Komision të Ankesave të pacientëve në SHSKUK, i cili do të shqyrtojë çdo ankesë dhe shqetësim të qytetarëve”, thuhet në njoftim.

Të premten e javës së kaluar KOHA ka raportuar se te një pacient është ndërhyrë pa anesteziolog në Klinikën e Urologjisë, ndërkaq në arsyetimin nga Klinika, është thënë se pati urgjencë dhe se anesteziologu duhej të ishte në një sallë tjetër operimi.

Ndërkaq të dielën po ashtu në një artikull të KOHËS është raportuar se një pacient që ishte planifikuar të operohej në QKUK, më 17 nëntor, në fund të ditës është hequr nga orari i rregullt i operimeve, me arsyetimin se është pranuar një rast urgjent dhe se mjekëve u ka përfunduar orari i punës. Por, po të njëjtën ditë pacienti i është nënshtruar operimit në një spital privat dhe nga ekipi i QKUK-së që do të duhej ta operonte në sistemin publik.