Kryeministri i Kosovës, Albin Kurti, në mbledhjen e Qeverisë së Kosovës ka thënë se sulmi i të dielës në Banjskë ka dëshmuar për rrezikun, qëllimin dhe potencialin e grupeve kriminale e terroriste serbe në veri.
Ai ka thënë se në Banjskë u konfiskua sasi e armatimit me vlerë mbi 5 milionë euro.
Kurti ka thënë se të dielën u cenua sovraniteti i shtetit, integriteti dhe siguria kombëtare.
Ai u ka propozuar të gjithë qytetarëve të Kosovës të falënderojnë policinë e Kosovës kudo që t’i takojnë.
“Përballë kësaj u dëshmua profesionalizimi i jashtëzakonshëm i Policisë së Kosovës, dhe institucioneve të sigurisë në përgjithësi. Është dëshmuar kapaciteti i plotë për ta mbrojtur Republikën. Është suksesi më i madh që nga shpallja e pavarësisë, sukses që na bën krenar të gjithëve. Andaj sot ju ftoj të gjithëve këtu, gjithë qytetarët e Kosovës, të falënderojnë policinë në uniformë kudo dhe kurdo që i shohin”, ka thënë Kurti.
Edhe
Kurti: Sulmi në Banjskë ka qenë agresion kundër sovranitetit shtetëror
Ai po ashtu ka thënë se sulmi ka shfaqur nevojën për bashkëpunim më të madh ndërkombëtar në mbrojtjen e kontrollin e kufirit me Serbinë.
“E bashkë me të edhe nevojën për dënim të hapur me gjuhë të qartë e të përveçme e kërkesa të prera ndaj Serbisë nga komuniteti ndërkombëtar”, tha Kurti.
Ai ka thënë se pas dokumentimit për pjesëmarrjen e nënkryetarit të Listës Serbe, Milan Radoiçiq, në sulmin në Banjskë, është vërtetuar edhe se është jetike ringjallja e pluralizimit politik për serbët e Kosovës.
“Nuk ka demokraci e liri pa pluralizëm”, ka thënë Kurti.
Ministri i Kulturës, Hajrulla Çeku, ka thënë se pos marrjes së jetës së policit Afrim Bunjaku, sulmi i armatosur ndaj Kosovës ka pasur qëllim edhe dëmtimin e marrëdhënieve ndërfetare e ndëretnike në Kosovë, pasi grupi që kreu aktin shfrytëzoi Manastirin e Banjskës në Zveçan.
Edhe
Kurti thotë se aktakuza për Banjskën ka mundur të ngrihej më herët
Siç ka thënë ai, ka dëme të mëdha në këtë manastir.
Ai ka thënë se Qeveria po pret krijimin e kushteve të nevojshme që ekipet të dalin në terren për të vlerësuar dëmet.
